ގްރޭޑް 8 ގެ ދަރިވަރުންގެ އިމްތިހާން ދެފިޔަވައްސަކަށް ބަހާލައިގެން ކުރިއަށްގެންދަން ތައުލީމާއި ބެހޭ ވުޒާރާއިން ނިންމައިފިއެވެ.

އެ ވުޒާރާއިން ސްކޫލްތަކަށް ފޮނުވި އިންޓާނަލް މެމޯ އެއްގައި ބުނީ، ސްކޫލްތަކުގެ ޕްރިންސިޕަލުންނާއި އެކު ބޭއްވުނު ޕޮލިސީ މަޝްވަރާ ބައްދަލުވުންތަކަށް ފަހު ގިނަ އަދަދެއްގެ ޕްރިންސިޕަލުންގެ ލަފައާއިއެކު، 2024 ގެ ދިރާސީ އަހަރުގެ ގްރޭޑް 8 ގެ ދަރިވަރުން ފަހު ޓާމްގެ މެދު ބަންދަށްފަހު ސްޓްރީމް ކުރުމަށް ނިންމާފައިވާކަމަށެވެ.

2024 ގެ ދިރާސީ އަހަރުގެ ޓާމްގެ އިމްތިހާންތައް ބޭއްވުމަށް ހަމަޖެހިފައިވާ ތާރީހަކީ 8-22 ފެބްރުއަރީ 2025 ނަމަވެސް، ގްރޭޑް 8 ގެ ދަރިވަރުން އިމްތިހާންކުރާނީ 2 ފިޔަވައްސަކަށް ބަހާލައިގެން ކަމަށެވެ.

Advertisement

މިގޮތުން، އެދަރިވަރުން ކިޔަވާ ކޮންބައިންޑް ސައިންސް، ކޮންބައިންޑް ބިޒްނަސް، އަދި ހިސާބު މާއްދާތަކުގެ އިމްތިހާން ކުރިއަށްގެންދާނީ 14-19 ޑިސެންބަރު 2024 އަށް ކަމަށާއި، ސޯޝަލް ސްޓަޑީޒް، ހެލްތު އެންޑް ޕީއީ އަދި ކްރިއޭޓިވް އާޓްސްގެ ފޯމެޓިވް އެސެސްމެންޓްތައް ވެސް މި މުއްދަތުގައި ނިންމަންވާނެކަމަށް ވުޒާރާގެ ސާކިއުލާގައިވެއެވެ.

އެ ވުޒާރާއިން ބުނީ، ގްރޭޑް 8 ގައި ކިޔަވާ ދަރިވަރުންގެ ފަހު ޓާމް އިމްތިހާނުގެ ދެވަނަ ފިޔަވަހި ކުރިއަށް ގެންދާނީ 15-20 ފެބްރުއަރީ 2025 އަށް ކަމަށާއި، މި ފިޔަވަހީގައި ދަރިވަރުން އިމްތިހާން ކުރާނީ އިސްލާމް، ދިވެހި އަދި އިނގިރޭސި މާއްދާއިން ކަމަށެވެ.

ގްރޭޑް 8 ގެ ދަރިވަރުންގެ ސްޓްރީމް މާއްދާތައް ކިޔަވަމުންދާއިރު، އެސެސްމަންޓް ފޯ ލާނިން ގެންދަންވާނެކަން ފާހަގަކުރަމުން އެ ވުޒާރާއިން ބުނީ، 2024 ގެ ދިރާސީ އަހަރުގެ ދެވަނަ ޓާމްގެ ރިޕޯޓް ފޮތް ހުރިހާ ދަރިވަރުންނަށް ވެސް ދޫކުރާނީ 27 ފެބްރުއަރީ 2025 ގައި ކަމަށެވެ.