ދިވެހި ރައްޔިތެއްކަން އަންގައިދޭ އައިޑީ ކާޑު، ޕްރިންޓް ކުރުމުގެ ޚިދުމަތް ދ. ކުޑަހުވަދޫގައި ފަށަން ތައްޔާރުވެފައިވާކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން ބުނީ، މިއީ މާލެ ފިޔަވައި އަތޮޅުތެރޭގެ ރަށެއްގައި އައިޑީ ކާޑު ޕްރިންޓް ކުރުމުގެ ޚިދުމަތް ދޭން ފަށާ ދެވަނަ ފަހަރު ކަމަށާއި، މީގެ ކުރިން މި ޚިދުމަތް ދެމުން އައީ ވެލާނާގެ ބިލްޑިންގގައި ހުންނަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު)ގެ އޮފީހުންނާއި ގއ. ވިލިނގިލީގައިކަމަށެވެ.

މިކަމާއި ގުޅިގެން ޑީއެންއާރު އިން ބުނީ، އައިޑީ ކާޑު، ޕްރިންޓް ކުރުމުގެ ޚިދުމަތް ކުޑަހުވަދޫގައި މާދަމާގެ ވަގުތެއްގައި ފަށާނެ ކަމަށާއި މި ޚިދުމަތް ދޭން ފަށަނީ ދ. އަތޮޅު ކައުންސިލްގެ އެހީތެރިކަމާއެކީގައި ކަމަށެވެ.

Advertisement

މި ޚިދުމަތް ކުޑަހުވަދޫގައި، ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ފައްޓައިވައިދެއްވުމަސް ހަމަޖެހިފައިވާއިރު، އެ ވުޒާރާއިން ބުނީ،އައިޑީ ކާޑްގެ ޚިދުމަތް ދިނުމަށް ބޮޑު ހޭދައެއްވާއިރު، އެކަމަށް ބޭނުންވާ މެޝިނަރީޒް ލިބެމުންދާވަރަކުން ޚިދުމަތް ދިނުމަށް މަސައްކަތްކުރަމުން އަންނަ ކަމަށެވެ.

ރާއްޖޭގެ މީހުން ދިރިއުޅޭ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީ ކާޑުގެ ޚިދުމަތް ފޯރުކޮށްދިނުމަކީ ރައީސް ޑރ. މުހައްމަދު މުޢިއްޒުގެ ވައުދުފުޅެއްކަން ފާހަގަކޮށްލަން ޖެހެއެވެ.