ހިޔާވަހި ފައިނޭންސް ސްކީމްގެ ދަށުން 2 ބިލިއަނަށް ވުރެ ގިނަ ރުފިޔާގެ ލޯނު އަހަރުގެ ތެރޭގައި ދޫކުރެވޭނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
"ހިޔާވަހި ފައިނޭންސް ސްކީމް" އިފްތިހާހްކުރުމަށް މިއަދު ބޭއްވި ރަސްމިއްޔާތުގައި ވާހަަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، މިއަހަރު ފާސް ކުރަން ހުށަހަޅާފައިވާ 2025 ވަނަ އަހަރުގެ ބަޖެޓްގައި މިއަދު އިއުލާނުކުރެވިގެންދިޔަ ސްކީމް ކުރިއަށް ގެންދިޔުމަށް 1 ބިލިއަން ރުފިޔާ ސަރުކާރުގެ ބަޖެޓުން ކަނޑައަޅާފައިވާކަމަށެވެ.
ރައީސް ޑރ.މުޢިއްޒު ވިދާޅުވީ، 1 ބިލިއަން ރުފިޔާ ބޭނުންކޮށްގެން އެޗްޑީއެފްސީއާއި ބީއެމްއެލް އަދި އެމްއައިބީ މެދުވެރިކޮށް 5 ޕަސެންޓްގެ އިންޓަރެސްޓްގެ މި ލޯންތައް ދޫކުރަމުންދާއިރު، ބަޖެޓްގައި ކަނޑައަޅާފައިވާ 1 ބިލިއަން ރުފިޔާގެ ބޭނުންކޮށްގެން 2 ބިލިއަނަށްވުރެ ގިނަ ރުފިޔާގެ ލޯނު ދޫކުރެވޭނެކަމަށެވެ.
"މި 1 ބިލިއަން ރުފިޔާގެ ބޭނުންކޮށްގެން 2 ބިލިއަނަށްވުރެ ގިނަ ރުފިޔާގެ ލޯނު ހަގީގަތުގައި ދޫކުރެވޭއެބަ. އެހެންވީމަ 2 ބިލިއަނަށްވުރެ ގިނަ ރުފިޔާގެ ލޯނު އަހަރު ތެރޭގައި ދޫކުރެވިގެންދާނެ އަޅުގަނޑުމެން މި ރާވާފައި އޮތް ގޮތުން."
ރައީސް ޑރ.މުޢިއްޒު ވިދާޅުވިއެވެ.
މީގެ ދަށުން ރާއްޖޭގެ ހުރިހާ ރަށަކަށް ދޫކުރާ ލޯން ސްކީމާއި، އާބަން ސެންޓަރ ގެ ގޮތުގައި ގެޒެޓްކުރެވޭ ރަށްތަކާއި ފުރަމާލެއަށް ދޫކުރާ ލޯނުތައް ކުރިއަށް އޮތް އަހަރުގެ ތެރޭގައި ނެގުމަށް ފުރުސަތު ދެވިގެންދާއިރު، އެއީ ޖުމްލަ 2 ބިލިއަނަށް ވުރެ ގިނަ ރުފިޔާގެ ލޯނުކަން ރައީސް ޑރ.މުޢިއްޒު ފާހަގަކުރެއްވިއެވެ.
މިއާއިއެކު، ރައީސް ޑރ.މުޢިއްޒު ވަނީ ކުރިއަށް އޮތް ކޮންމެ އަހަރަކުވެސް، ސަރުކާރުގެ ބަޖެޓުގައި މި މަޝްރޫއަށް 1 ބިލިއަން ރުފިޔާ ހިމަނާނެ ކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
