ޓޫރިޒަމް ދާއިރާގެ ބައެއް ޓެކްސް ބޮޑުކުރަން ފާސްކުރި ބިލްތައް ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ތަސްދީގު ކުރައްވައިފިއެވެ.

ސަރުކާރުގެ ފަރާތުން މަޖިލީހުގެ ތަޅުމަށް ހުށަހެޅި މި ބިލަކީ 31 އޮކްޓޫބަރު 2024 ވަނަ ދުވަހު ބޭއްވި 20 ވަނަ ރައްޔިތުންގެ މަޖިލީހުގެ 44 ވަނަ ޖަލްސާގައި ފާސްކުރެެއްވި ބިލެކެވެ.

މި ބިލުގައި، ޓޫރިޒަމް ދާއިރާގެ މުދަލާއި ޚިދުމަތުން ނަގަމުން އަންނަ ޓެކްސް (ޓީ.ޖީ.އެސް.ޓީ) ރޭޓަށް ވަނީ ބަދަލުގެންނަވާފައެވެ. އެ ގޮތުން، މިހާރު ޢަމަލުކުރަމުންދާ ޤާނޫނުގައި، ޓޫރިޒަމް ދާއިރާގެ މުދަލާއި ޚިދުމަތްކަމަށް ބަލާ މުދަލާއި ޚިދުމަތްތަކުންމިހާރު،  ޓީ.ޖީ.އެސް.ޓީގެ ގޮތުގައި ނަގަމުން އަންނަ %16 ގެ ޓެކްސް ރޭޓް ވަނީ  އަންނަ އަހަރުގެ ޖުލައިމަހުގެ 1 ވަނަ ދުވަހުން ފެށިގެން %17 އަށް ބޮޑުކޮށްފައެވެ.

ފާށްކުރި ބިލަށް ބަލާއިރު،  ޓޫރިޒަމް ދާއިރާގެ މުވައްޒަފުންނަށް ޚާއްޞަކޮށްގެން ހިންގާ ފިހާރަތައް، ޓޫރިޒަމް މުދަލެއް ނުވަތަ ޚިދުމަތެއްގެ ގޮތުގައި ޝަރުޠު ހަމަވާ ޚިދުމަތްތަކުގެ ތެރެއިން ވަނީ އިސްތިސްނާކޮށްފައެވެ. މި އިޞްލާޙުގެ ދަށުން، މުވައްޒަފުންނަށް ޚާއްޞަކޮށްގެން ހިންގާ ކެފޭތައްވެސް ހިމެނެއެވެ.

ޓީޖީއެސްޓީގެ އިތުރުން ރައީސުލްޖުމްހޫރިއްޔާ ވަނީ ގްރީން ޓެކްސް ބޮޑުކުރުމަށް އިސްލާހު ހުށަހެޅި ބިލްވެސް ތަސްދީގް ކުރައްވާފައެވެ.މި ބިލް ތަސްދީގް ކުރުމާ ގުޅިގެން އަންނަ އަހަރުން ފެށިގެން ކުރިން ހަ ޑޮލަރު، ގްރީން ޓެކްސްގެ ގޮތުގައި ދައްކަމުން އައި ތަންތަނުން 12 ޑޮލަރު ދައްކަން ޖެހޭނެ އެވެ. އަދި ތިން ޑޮލަރު ދައްކަމުން އައި ތަންތަނުން ހަ ޑޮލަރު ދައްކަން ޖެހޭނެއެވެ.

އެއާޕޯޓް ޓެކްސްއަށް ގެނައި އިސްލާހަށް ބަލާއިރު، އަންނަ ޑިސެމްބަރުމަހުގެ އެއްވަނަ ދުވަހުން ފެށިގެން އެއާޕޯޓު ފީ ބޮޑު ކުރާ ގޮތަށް ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ ތެރެއިން އިކޮނޮމީ ކުލާހުން ފުރާ ކޮންމެ ބިދޭސީންގެ އަތުން ނަގާ 30 ޑޮލަރުގެ ބަދަލުގައި 50 ޑޮލަރު ނެގުމަށް ވަނީ ނިންމާފައެވެ. ބިޒްނަސް ކުލާހުން ދަތުރުކުރާނަމަ، ފުރާ ދިވެހިންނާއި ބިދޭސީންގެ އަތުން މިހާރު ނަގަމުން އަންނަ 60 ޑޮލަރުގެ ބަދަލުގައި 120 ޑޮލަރު ނެގުމަށް ވަނީ ނިންމާފައެވެ. އަދި އަމިއްލަ ޖެޓްތަކުގައި އަންނަ މީހުންގެ އަތުން ވަނީ 120 ޑޮލަރުގެ ބަދަލުގައި 480 ޑޮލަރު ނެގުމަށް ނިންމާފައެވެ.