އެމެރިކާގެ ރިޔާސީ އިންތިޚާބުގައި ވާދަވެރިކަން ބޮޑު ސްޓޭޓެއް ކަމަށްވާ ނޯތު ކެރޮލައިނާ އިން ރިޕަބްލިކަން ކެންޑިޑޭޓް ޑޮނަލްޑް ޓްރަމްޕް ކުރި ހޯދައިފިއެވެ.

އެމެރިކާގެ ރިޔާސީ އިންތިޚާބުގައި ވާދަކުރާ ދެ ކެންޑިޑޭޓުންނަކީ ޑިމޮކްރެޓިކް ޕާޓީގެ ކަމަލާ ހެރިސް އާއި ރިޕަބްލިކަން ޕާޓީގެ ޑޮނަލްޑް ޓްރަމްޕްއެވެ.

ނޯތު ކެރޮލައިނާ އަކީ މި އިންތިޚާބުގައި ނަތީޖާ އިއުލާނުކުރެވުނު ފުރަތަމަ ވާދަވެރި ސްޓޭޓެވެ. 

Advertisement

16 އިލެކްޓޯރަލް ވޯޓު ލިބޭ މި ސްޓޭޓް 1968 އިން ފެށިގެން ޑިމޮކްރެޓުންނަށް ލިބިފައިވަނީ އެންމެ ދެ ފަހަރެއްގައެވެ. އެއީ 1976 އަދި 2008 ވަނަ އަހަރުއެވެ. ނަމަވެސް، މި ސްޓޭޓުގައި އަންނަމުންދާ ޑިމޮކްރެޓިކް ބަދަލުތަކާއި، ސިޔާސީގޮތުން ހަރަކާތްތެރި އާބާދީއެއް އޮތުމާއެކު، މި ސްޓޭޓު ޑިމޮކްރެޓުންނަށް ކާމިޔާބުކުރެވިދާނެ ކަމަށް ސިޔާސީ ތަޖުރިބާކާރުން ގަބޫލުކުރަމުން ދިޔައެވެ.

ޓްރަމްޕްގެ މި ކާމިޔާބީއާއެކު، ދެން ބާކީ އޮތީ ވާދަވެރިކަން ބޮޑު ހަ ސްޓޭޓެކެވެ. އެއީ ޕެންސިލްވޭނިއާ، މިޝިގަން، ވިސްކޮންސިން، ޖޯޖިއާ، ނެވާޑާ އަދި އެރިޒޯނާއެވެ. މީގެ ތެރެއިން އެންމެ މުހިންމު ސްޓޭޓަކީ ޕެންސިލްވޭނިއާ ކަމަށް ވާއިރު، ޑިމޮކްރެޓިކް ކެންޑިޑޭޓް ކަމަލާ ހެރިސްއަށް އިންތިޚާބު ކާމިޔާބު ކުރުމަށް މި ސްޓޭޓަކީ ވަރަށް މުހިންމު ސްޓޭޓެކެވެ.

އެމެރިކާގެ މި އިންތިޚާބު ގިނަ ސަރަޙައްދުތަކުގައި ކުރިއަށްދަނީ ވަރަށް އޮމާންކަމާއެކުގައި ކަމަށް މީޑިއާ ރިޕޯޓްތައް ބުނެއެވެ. އަދި ބައެއް ސަރަޙައްދުތަކުގައި ވޯޓު ގުނުން ވެސް ފަށައިފިއެވެ.

އިންތިޚާބުގެ ކުރިން ކުރެވުނު ސަރވޭތަކުން ދައްކާގޮތުގައި ދެ ކެންޑިޑޭޓުންގެ މެދުގައި ވަރަށް ބޮޑު ވާދައެއް އެބައޮތެވެ. ޚާއްޞަކޮށް އެރިޒޯނާ، ޖޯޖިއާ، މިޝިގަން، ނެވާޑާ، ނޯތު ކެރޮލައިނާ، ޕެންސިލް ވޭނިއާ އަދި ވިސްކޮންސިން ފަދަ ހަތް ސްވިންގ ސްޓޭޓުގައި ދެ ކެންޑިޑޭޓުންގެ މެދުގައި ވަރަށް ބޮޑު ވާދައެއް އޮތްކަމަށް ފެނެއެވެ.

އެމެރިކާގެ ރިޔާސީ މަޤާމު ކާމިޔާބުކުރުމަށް، ކެންޑިޑޭޓަކު މަދުވެގެން 270 އިލެކްޓޯރަލް ވޯޓު ހޯދަންޖެހެއެވެ. ވަގުތީ ނަތީޖާ ދައްކާ ގޮތުން، ޓްރަމްޕަށް ލޮބިފައިވަނީ 230 އިލެކްޓޯރަލް ވޯޓެވެ. އަދި ހެރިސް އަށް ލިބުނީ 205 ވޯޓެވެ.