ކްރިޕްޓޯ ކަރަންސީ ރާއްޖެ އަށް ތައާރަފް ކުރުމާއި ބެހޭ ގޮތުން ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތީރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރަށް ދަންނަވާފައިވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރާއްޖޭގެ 20 އަހަރުގެ ގައުމީ ތަރައްގީ ޕްލޭންގެ މަޝްވަރާ ބައްދަލުވުން އިފްތިތާހްކޮށްދެއްވަމުން ރައީސް ޑރ.މުޢިއްޒު ވިދާޅުވީ، ދުނިޔެއަށް އަންނަމުންދާ ތަރައްގީއަށް ބަލާއިރު، އޭއައި އެކުލެވޭ ތަރައްގީގެ ޕްލޭނެއްގެ ތެރެއިން ނޫނީ ކުރިއަށް ނުދެވޭނެކަމަށެވެ.
ޑިޖިޓަލް އިކޮނޮމީތައް އުފެދިގެންދާތަން ފެންނަމުންދާކަމަށާއި، 2030 އާއި ހަމައަށް ދާއިރު ރާއްޖޭގެ ޖީޑީޕީގެ 15 އިންސައްތައަކީ ޑިޖިޓަލް އިކޮނޮމީއަށް ހަދަން ޖެހޭކަމަށެވެ.
"އަޅުގަނޑު ދާދި ފަހުން ދެންނެވިން އެމްއެމްއޭގައި ގަވަރުނަރަށް ބައްލަވާދެއްވާށޭ ފުލީ ރެގިއުލޭޓެޑް ގޮތަކަށް އަޅުގަނޑުމެންނަށް ކިހާވަރަކަށްތޯ ކްރިޕްޓޯ ކަރަންސީ، ޑިޖިޓަލް ކަރަންސީ ރާއްޖެއަށް ތައާރަފްކުރެވޭނީ. އަޅުގަނޑުމެންގެ އިކޮނޮމީ ޑައިވާސިފައި ކުރެވޭނީ ކިހާވަރަކަށްތޯ ޑިޖިޓަލް ކަރަންސީ ތައާރަފްކޮށްގެން،"
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، ރާއްޖެ ތަރައްގީ ވާނީ ދުނިޔެ އަށް އަންނަމުންދާ ބަދަލުތަކާއި ތަރައްގީއާއި ހަމައަށް ފައި ހަމަކޮށްގެން ކަމަށެވެ.
މިހުރިހާ ކަމަކާއި އެކުވެސް ދިވެހިންނަކީ މާތްވެގެންވާ އިސްލާމްދީނުގައި ތިބި، ފަޚުުރުވެރި ބަޔަކަށްވާތީ، ކާބަފައިން ގެނެސްދިން ހަގީގަތް މަތިން އަބަދުވެސް ހަނދާންކޮށް، ގައުމު ކުރިއަށް އޮތް ޖީލުތަކަށް ތަރައްގީކޮށް ގެންދިޔުމުގައި އެންމެން ބައިވެރިވެގެން މަސައްކަތްފެށުމަށް ރައީސް ޑރ.މުޢިއްޒު ވަނީ ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
