އެމެރިކާގެ ރިޔާސީ ރޭހުގައި ވާދަކުރާ އިދިކޮޅު ރިޕަބްލިކަން ޕާޓީގެ ރިޔާސީ ކެންޑިޑޭޓް އަދި ކުރީގެ ރައީސް ޑޮނަލްޑް ޓްރަމްޕް، ޑިމޮކްރެޓިކް ޕާޓީގެ ވާދަވެރިޔާ ކަމަލާ ހެރިސްގެ މައްޗަށް އިންތިޚާބު ކާމިޔާބުކުރި ކަމަށް އިއުލާންކޮށްފިއެވެ.

ވެސްޓް ޕާމް ބީޗްގައި ސަޕޯޓަރުންނާ މުޚާތަބު ވާހަކަދައްކަމުން، ރިޕަބްލިކަން ޕާޓީގެ ރިޔާސީ ކެންޑިޑޭޓް ޑޮނަލްޑް ޓްރަމްޕް، މިކަން އިއުލާންކުރީ ޕެންސިލްވޭނިއާ، ނޯތު ކެރޮލައިނާ އަދި ޖޯޖިއާ ފަދަ މުހިންމު ސްޓޭޓްތަކުން އޭނާއަށް ލިބުނު ކާމިޔާބީއާއި ގުޅިގެންނެވެ. 

މިހާތަނަށް އިއުލާން ކުރެވުނު ނަތީޖާއަށް ބަލާއިރު ޓްރަމްޕަށް ލިބިފައިވަނީ 267 އިލެކްޓޯރަލް ވޯޓެވެ. މިއީ ކާމިޔާބަށް ބޭނުންވާ 270 ވޯޓާ ވަރަށް ކައިރި އަދަދެކެވެ. ބާކީ އޮތް 3 ވޯޓު އެލާސްކާއިން ލިބޭނެ ކަމަށް ސިޔާސީ ތަޖުރިބާކާރުން ލަފާކުރެއެވެ.

އެސޯސިއޭޓެޑް ޕްރެސްގެ ރިޕޯޓުތަކުން ދައްކާ ގޮތުގައި ރިޕަބްލިކަން ޕާޓީން ސެނެޓުގެ ބާރުވެސް ވަނީ އަނބުރާ ހޯދާފައެވެ.

އިންތިޚާބު ކާމިޔާބުވިކަން އިއުލާންކޮށް ވާހަކަދައްކަމުން ޓްރަމްޕް ވަނީ އޭނާގެ ސަޕޯޓަރުންނަށް ޝުކުރު އަދާކޮށްފައެވެ.

ޚާއްސަކޮށް އޭނާގެ ރަނިންގ މޭޓް ޖޭޑީ ވާންސް، ޓެސްލާގެ ސީްލާގެ ސީއީއޯ އެލޮން މަސްކް އަދި ކުރީގެ ރިޔާސީ ކެންޑިޑޭޓް ރޮބަޓް އެފް. ކެނެޑީ ޖޫނިއަރއަށް ޝުކުރު އަދާކޮށްފައިވެއެވެ.

"މި އިންޤިލާބީ ހަރަކާތުގައި އަޅުގަނޑުމެންނަށް ވަނީ އެތައް ހާސް ރައްޓެހިންނެއް ލިބިފައި. މިއީ މީގެ ކުރިން އެއްވެސް މީހަކަށް ފެނިފައިނުވާ ހަރަކާތެއް. އަދި ޙަޤީޤަތުގައި މިއީ ތާރީޚުގައި އުފެދުނު އެންމެ ބޮޑު ސިޔާސީ ހަރަކާތް ކަމަށް އަހަރެން ޤަބޫލުކުރަން،" އޭނާ ބުންޏެވެ.

އިތުރަށް ވާހަކަދައްކަމުން ޓްރަމްޕް ބުނީ، އެމެރިކާގެ އަންނަން އޮތް ޖީލުތަކަށާއި އަދި އެންމެހާ ރައްޔިތުންނަށް ޙައްޤުވާ، ރައްކާތެރި އަދި ފުދުންތެރި އެމެރިކާއެއް ގެނެސްދިނުމަށް ޓަކައި މަސައްކަތް ކުރާނެ ކަމަށެވެ. އަދި ކުރިއަށް އޮތީ ”ޙަޤީޤަތުގައިވެސް އެމެރިކާގެ ރަން ޒަމާން ކަމުގައި ވާނެ،" ކަމަށް އޭނާ ބުންޏެވެ.

އިންތިޚާބު ކާމިޔާބު ވެއްޖެ ކަމަށް ޓްރަމްޕް އިއުލާން ކުރި ނަމަވެސް، މުޅި ޤައުމުގެ ފައިނަލް ވޯޓު ގުނުން ނިމުމަށް އަދި ދުވަސްތަކެއް ނަގާނެއެވެ.