ރާއްޖޭގެ ހުރިހާ ސްކޫލްތަކެއްގެ ކްލާސްރޫމްތަކެއްގައި ވެސް އޭސީ ހަރުކުރުމަށް ސަރުކާރުން ފަށާފައިވާ "ކޫލް ސްކޫލް" ޕްރޮޖެކްޓަށް ޗައިނާ ސަރުކާރުން އޭސީ ހަދިޔާކޮށްފިއެވެ.

އެކަމަށް ޚާއްސަކޮށް، ބޭއްވި ރަސްމިއްޔާތެއްގައި ޗައިނާ ސަރުކާރުގެ ފަރާތުން އޭސީތައް ހަވާލުކޮށްދެއްވީ އެގައުމުން ރާއްޖެއަށް ކަނޑައަޅާފައި ހުންނަވާ ސަފީރު، ވަންގް ލިޒިންއެވެ. ސަރުކާރުގެ ފަރާތުން އޭސީތަކާ ހަވާލުވެދެއްވީ ތައުލީމާއި ބެހޭ ވަޒީރު ޑރ. އިސްމާއިލް ޝަފީޢުއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޝަފީއު ވިދާޅުވީ، މިއީ ދެ ގައުމުގެ ދެމެދުގައި އޮތް އެކުވެރިކަމުގެ ގާތް ގުޅުން ރަމްޒުކޮށްދޭ ކަމެއްކަމަށެވެ.

މި ޕްރޮޖެކްޓަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅާއެކު، ބްރޭންޑެއްގެ ގޮތުގައި ފެށި ޕްރޮޖެކްޓެއް ކަން ފާހަގަކުރައްވާ ވަޒީރު ޝަފީއު ވިދާޅުވީ، މި ޕްރޮޖެކްޓެގެ ކޮންސެޕްޓަކީ ދަރިވަރުންނަށް ހިތްފަސޭހަކަން ހޯދައިދިނުންކަމަށާއި، އެގޮތުން ކޮންމެ ސުކޫލެއްގެ އަމާޒަކަށް ވެގެން ދާނީ "ކޫލް" މާހައުލެއްގައި ހިތްހަމަޖެހޭ މަސައްކަތްތަކެއްކޮށް، ދަރިވަރުންނާއި ޓީޗަރުންގެ ތެރޭގައި ގުޅުން ރަނގަޅުވެގެން ދިޔުންކަމަށެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވަނީ ޗައިނާއާއި ދިވެހިރާއްޖެއާ ދެމެދު އޮންނަ ގާތް ގުޅުން ފާހަގަކުރައްވާ، މި މަޝްރޫޢުގެ ސަބަބުން ރާއްޖޭގެ ތަޢުލީމީ ދާއިރާއަށް ހެޔޮ ބަދަލެއް ގެނެސްދޭނެކަމަށް އުންމީދުކުރައްވާ ކަމަށް ވިދާޅުވެފައެވެ. 

"ކޫލް ސްކޫލް" ޕްރޮޖެކްޓް އިފްތިތާހުކޮށްފައިވަނީ މި އަހަރުގެ ޖޫން މަހު މާފުށީ ސްކޫލްގައި ބޭއްވި ރަސްމިއްޔާތެއްގައެވެ.

އެ ރަސްމިއްޔާތުގައި ވާހަހަފުޅު ދައްކަވަމުން ވަޒީރު ޝަފީއު ވަނީ، ސްކޫލުތައް ފިނިކުރުމަށްޓަކައި ހިންގާ މި މަޝްރޫއު ނިމުމުން، މިހާރު ސްކޫލްތަކުގެ ކަރަންޓު ބިލަށް ހޭދަވާ ވަރަށްވުރެ އިތުރަށް ޚަރަދުވާނީ 38 އިންސައްތަ ކަމަށް ވިދާޅުވެފައެވެ.