އެމެރިކާގެ ރިޔާސީ އިންތިހާބު ކާމިޔާބު ކުރެއްވި އެ ގައުމުގެ ކުރީގެ ރައީސް އަދި ރިޕަބްލިކަން ޕާޓީގެ ރިޔާސީ ކެންޑިޑޭޓް ޑޮނަލްޑް ޓްރަމްޕަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.

މިއަދު ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއާއި އެމެރިކާގެ ގުޅުމަކީ އެއް ގައުމުން އަނެއް ގައުމަށް ކުރާ އިހްތިރާމާއި ހެޔޮނިޔަތާއި އަމިއްލަ ވިސްނުމެއްގެ މައްޗަށް ބިނާވެފައިވާ ހަރުދަނާ ގުޅުމެއް ކަމަށެވެ. 

އަދި ދެ ގައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، ގޮންޖެހުންތަކަށް ހައްލު ހޯދައި، ދުނިޔޭގެ ސުލްހައާއި ހަމަޖެހުމަށް މަސައްކަތް ކުރުމަށް ތައްޔާރަށް ހުންނެވި ކަމަށްވެސް ވިދާޅުވެފައިވެ އެވެ.

Advertisement

އުމުރުން 78 އަހަރުގެ ޓްރަމްޕް، އޭނާގެ ވާދަވެރިޔާ، 60 އަހަރުގެ، ޑިމޮކްރެޓިކް ޕާޓީގެ ވާދަވެރިޔާ ކަމަލާ ހެރިސްގެ މައްޗަށް ކުރި ހޯދައި އެމެރިކާގެ ރިޔާސީ އިންތިޚާބު ކާމިޔާބު ކޮށްފައިވާކަން މިހާރު ވަނީ ޔަގީންވެފައެވެ.

އިންތިޚާބުގެ ނަތީޖާ ދައްކާގޮތުން ޓްރަމްޕް ވަނީ 277 އިލެކްޓޯރަލް ވޯޓް ހޯދާފައެވެ. ކަމަލާ ހެރިސްއަށް ލިބުނީ 224 ވޯޓެވެ. އިންތިޚާބު ކާމިޔާބު ކުރުމަށް ބޭނުންވަނީ 270 އިލެކްޓޯރަލް ވޯޓެވެ.