ރައީސް ޑރ.މުހައްމަދު މުއިއްޒު ވެރިކަމަށް ގެނައުމަށް ރުހެވުނީތީވެ، މިހާރު ދެރަފުޅުވާކަމަށް ކުރީގެ ރައީސް އަބްދުﷲ ޔާމީނު ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމުގައި ވާހަކަދައްކަވަމުން ރައީސް ޔާމީނު ވިދާޅުވީ، ޑރ.މުއިއްޒަށް ތާއީދު ކުރެވުނީތީވެ މިހާރު ވަރަށް ރިގްރެޓް ކުރާކަމަށެވެ. ރައީސް ޔާމީނު ވިދާޅުވީ، ޑރ.މުއިއްޒަކީ ޕީޕީއެމްގެ މުޑުވަކުން ރިޔާސީ ކެނޑިޑޭޓެއްގެ ގޮތުގައި ރައްޔިތުންނަށް ދެއްކި ކެނޑިޑޭޓެއް ކަމަށާއި، ވެރިކަން ލިބުމަށްފަހު މިހާ ޒިންމާދާރުކޮށް ކަންކަން ކުރައްވާނޭކަމަށް ދުވަހަކުވެސް އުއްމީދެއް ނުކުރައްވާކަމަށެވެ.

ރައްޔިތުން މިހާރު ތަހައްމަލުކުރަމުންދަނީ ވަރަށް ދަތި ދުވަސްތަކެއްކަން ފާހަގަކުރަމުން ރައީސް ޔާމީން ވިދާޅުވީ، ވެރިކަމަށް އައުމުގެ ކުރިން ކަނޑައެޅި ސިޔާސަތުތައް ރައީސް ޑރ.މުއިއްޒު ދޫކޮށްލައްވާފައިވާކަމަށެވެ. މިގޮތުން އިންޑިއާ ސިފައިން ރާއްޖެއިން ބޭލުމުގެ މައްސަލައާއި، ޗާގޯސްގެ މައްސަލާގައި މި ސަރުކާރުން ގެންގުޅެމުންދާ ސިޔާސަތު ކަމުނުދާކަމަށް ރައީސް ޔާމީން ވަނީ ފާހަގަކުރައްވާފައެވެ.

Advertisement

ޔާގޯސްގެ ރަށްތައް ހޯދުމުގެ މުހިއްމުކަން ފާހަގަކުރައްވަމުން ރައީސް ޔާމީނު ވިދާޅުވީ، މަސައްކަތްކޮށްގެން އެ ރަށްތައް ހޯދިއްޖެނަމަ އިގްތިސާދީ ގޮތުން ދިވެހިންނަށް އެތައް މަންފާއެއް ލިބޭނޭ ކަމަށެވެ. އެގޮތުން އެތަނުގައި ފަތުރުވެރިކަން ތައާރަފް ކުރެވިއްޖެނަމަ ޓޫރިޒަމް އެހެން ހަރުފަތަކަށް ގެންދެވޭނޭކަން ރައީސް ޔާމިނު ފާހަގަކުރެއްވިއެވެ.

ސަރުކާރަށް ކިޔަމުންދާ ފާޑުކިޔުއްވުންތަކާ ގުޅޭގޮތުން ރައީސް ޔާމީނު ވިދާޅުވީ، ޕާސަނަލީ ރައީސް ޑރ.މުއިއްޒުއާ އެއްވެސް މައްސަލައެއް ނެތްކަމަށާއި، ފާޑުކިޔަނީ އެމަނިކުފާނުގެ ސިޔާސަތުތަކުގެ ތެރެއިން ގޯސްކޮށް ދާ ކަންކަމަށް ކަމަށެވެ. މިގޮތުން އަދުގެ ސަރުކާރުގެ ކަންކަން ކުރިއަށް މި ދަނީ ރައީސް ސޯލިހު ސަރުކާރުގައިވެސް ކަންކަން ދިޔަމަގުންކަމަށް ރައީސް ޔާމީނު ވިދާޅުވިއެވެ.