މިމަހުގެ ތިން ވަނަ ދުވަހު ރިލީސްކުރެވުނު، އިސްލާމިކް ރިދަމްގެ ”ރޮއްވާލާފައި ލޯތައް“ ލަވަ ތައްޔާރު ކުރުމުގެ ހަރަކާތްތެރިވި ފަރާތްތަކުން، އެ ލަވައިގެ މަސައްކަތުގެ ތަޖުރިބާ ހިއްސާކޮށްފިއެވެ. 

އެހީ ޖަމިއްޔާގެ އެހީތެރިކަމާއެކު ނެރުނު މި ލަވައިގެ އޯޑިއޯ ރިކޯޑިންގ ހަދާފައި ވަނީ، ހުސައިން ތައުފީޤު (ކުޑަ ހުސައިން) އެވެ. ވީޑިއޯ ތައްޔާރު ކުރީ އޯކޭޒް އިންކް އިންނެވެ. 

މޫސާ ޝިފާޢުގެ އަޑުން ކިޔާފައިވާ މި ލަވައަކީ، އިސްލާމިކް ރިދަމްގެ ފައުންޑަރ އެއް ކަމަށްވާ އަޙްމަދު ރިފާޢުގެ މަންމަ، އާބިދާ އަބްދުالله އަށް ޚާއްސަ ކުރެވިފައިވާ މަދަހައެކެވެ. އާބިދާ ނިޔާވެފައި ވަނީ މި އަހަރުގެ ސެޕްޓެމްބަރ މަހުގެ ފަހުކޮޅުގައެވެ. 

މި ލަވަ ރިލީސް ކުރުމާއެކު އެ ލަވަ ކިޔުއްވި، މޫސާ ޝިފާޢު ވަނީ އެ ލަވައިގެ ޅެން ލިޔުއްވި ރިފާޢުގެ ހިތުގައި އޭނާގެ މަންމަ އަށް އޮތް ޤަދަރާއި، މަންމައަށް އޭނާ ކުރި އިހްތިރާމް، އަދި މަންމަ ވަކިވުމުން ކުރާނެ ފުން އަސަރުގެ ވާހަކަތައް ކިޔައި ދީފައެވެ.

އަދި، އެހެން ލަވަ ނުވަތަ މަދަހަ ކިޔުމަށް ތައްޔާރުވާންޖެހޭ ވަރަށްވުރެ ބޮޑަށް ކުރިއާލައި އެ ލަވަ ކިޔުމަށް ސިކުނޑިތައްޔާރު ކުރަންޖެހުނުކަންވެސް އޭނާ ފާހަގަކުރިއެވެ. 

ޝިފާޢުގެ އިތުރުން، މި ލަވައިގެ އޯޑިއޯ ރިކޯޑިން ހެދުމުގެ މަސައްކަތް ކުރި ކުޑަހުސައިން ބުނެފައިވާ ގޮތުން، މިއީ އޭނާއަށް ކުރެވުނު އެންމެ ހިތްހަމަޖެހޭ އެއް މަސައްކަތެވެ.

މި ލަވައިގެ ސްކްރީން ޕްލޭގެ މަސައްކަތް ކޮށްފައިވާ މަހުދީ އަހްމަދު ބުނެފައިވާގޮތުން، މީގެ ސްކްރީން ޕްލޭ ލިޔުނު އިރު، އޭނާގެ މަރްޙޫމް ބައްޕަގެ ހަނދާންތައް ދިޔައީ އައުވަމުންނެވެ. 

”ބައްޕަ ނިޔާވި ދުވަސް. އަހަރެންގެ ކަރުނަތަކެއް ނުހިފެހެއްޓުނު. ލަވައިގެ ކޮންމެ ބަހެއް، ކޮންމެ މަންޒަރެއް.. ވަރަށް ފުންކޮށް އިހްސާސް ކުރެވުނު.“ މަހުދީ އަހުމަދު ބުނެފައިވެއެވެ.

މި ލަވައިގެ ލީޑް ރޯލުން ފެނިގެންދާ ހަސަން ދިލްޝަން އަކީ ރިފާޢުގެ މަންމަ އާއި އާއިލީ ގޮތުން ގުޅުން އޮންނަ ފަރާތަކަށް ވާއިރު ލަވައިން އޭނާއަށް ކުރި އަސަރު ބޮޑެވެ. ލަވައާއެކު އޭނާ ވަނީ މުޖުތަމަޢުއަށް މުހިންމު މެސެޖެއް ވެސް ރައްދު ކޮށްދީފައެވެ. 

ރިފާޢުގެ ”ރޮއްވާފައި ލޯތައް“ ޅެމުން، ކިޔައިދިނީ މަންމަ ވަކިވުމުން ދަރިންނަށާއި މުޅި އާއިލާއަށް ލިބިގެންދާ ހުސްކަމާއި ފަޅުކަމެވެ. އެގޮތުން، މަންމަ ވަކިވެގެން ދިޔަ ނަމަވެސް، މަންމަ ހުންނަ ކަމުގެ އިހްސާސް ކުރެވޭއިރު، އެ މަންމަ ހަގީގަތުގައި ދުނިޔޭގައި ނެތް ކަން ގަބޫލުކޮށް އެ ހަގީގަތާއި ކުރިމަތިލާ ދަރިންނަށް ލިބޭ ފުން ހިތާމައާއި ކެކުޅުން، ޅެމުން ވަރަށް ރީތިކޮށް ސިފަ ކޮށްދީފައިވެއެވެ. 

ހަމަ އެއާއެކު، މަންމަގެ ފަހު ވަގުތާއި، ބަލި ހާލުގައި އެ މަންމަ އިސްކުރި ކެތްތެރިކަމުގެ ރިވެތި ނަމޫނާ ޅެމުން ސިފަކޮށްފައިވާ ގޮތް ވަރަށް ފުރިހަމައެވެ. 

މީގެ އިތުރުން، މަންމަ ވަކިވެދިޔުމުގެ ޚަބަރުގައި ހުރި ވޭނާއި، އެ މަންމަ ކަފުންކޮށް ވަޅުލާއިރު ދަރިންނާއި ޢާއިލާ ތަހަންމަލްކުރާ ހިތްދަތިކަން ގެނެސްދީފައިވަނީ، މި ޅެން އަޑުއަހާލާ ކޮންމެ މީހަކުވެސް ހަގީގަތުގައިވެސް ”ރޮއްވާލާ“ ފަދަ ގޮތަކަށެވެ.

އެގޮތުން، މަދަހަ މީސް މީޑިއާއަށް ދޫކޮށްލުމާއެކު އެއަށް ކޮމެންޓް ކުރި ގިނަ މީހުން ވަނީ، ”ވަރަށް ބޮޑަށް އަސަރުކޮށް ރޮއްވާލައިފި“ ކަމަށް ބުނެފައެވެ.