ރަށްރަށުގައި ތިބެގެން ދަރިވަރުންނަ ކިޔެވޭނެ އިންތިޒާމް ފަހިކޮށްދިނުމުގެ މަސައްކަތް ކުރަމުންދާކަމަށް ތައުލީމާއި ބެހޭ ވަޒީރު ޑރ.އިސްމާއީލް ޝަފީއު ވިދާޅުވެއްޖެއެވެ.
ވަޒީރު ޝަފީއު މިފަދައިން ވިދާޅުވީ، މުދައްރިސުން ތަމްރީނުކުރުމުގެ ޤައުމީ ޕްރޮގްރާމްވަނީ އިފްތިތާހް ކުރުމުގެ ރަސްމިއްޔާތުގައި ވާހަަކަފުޅު ދައްކަވަމުންނެވެ.
މިގޮތުން ރައީސް ޑރ.މުޙައްމަދު މުއިއްޒު ކެމްޕޭނަށް ވަޑައިގެންނެވިއިރުއާއި އޭގެ ފަހުން އަތޮޅު ތެރެއަށް އެމަނިކުފާނު ކުރެއްވި ދަތުރުފުޅުތަކުގައި ވެސް ރަށުގައި ހުރެގެން މަތީ ތައުލީމް ފުރުސަތު ފަހިކޮށްދެވުމަށް ގިނަ ރައްޔިތުންތަކެއް އެދުނު ކަން ފާހަގަކުރައްވާ ވަޒީރު ޝަފީއު ވިދާޅުވީ، ގައުމީ ޔުނިވާސިޓީ، އިސްލާމިކް ޔުނިވާސިޓީ، ވިލާ ކޮލެޖު އަދި ޔޫއޭއީގެ އެހީތެރިކަމާއެކު އެ ޕްރޮގްރާމްގައި ވީހާ ވެސް ގިނަ މާއްދާތަކެއް ދަރިވަރުން ރަށުގައި ތިބެގެން ކިޔެވޭނެ މަގު ފަހިކޮށްދިނުމަށް އެއްބަސްވެފައިވާ ކަމަށެވެ.
ވަޒީރު ޝަފީއު ވިދާޅުވީ، މާލެއަށް ހިޖުރަކޮށް މާލޭގައި ދިރިއުޅުމުގެ ހަރަދުތައް ބެލެހެއްޓުމަކީ ކޮންމެ ކޮންމެ އާއިލާއަކަށް ކުޅަދާނަ ކަމަކަށް ނުވާނެކަމަށާއި، އެހެންކަމުން، ރައީސް ޑރ.މުޢިއްޒުގެ ސިޔާސަތުގައިވާ ގޮތުގެ މަތިން ދަރިވަރުންނަށް ރަށުގައި ތިބެގެން ކިޔެވޭނެ ގޮތް ފަހިކޮށްދިނުމުގެ މަސައްކަތް ކުރަމުން އަންނަކަމަށެވެ.
"މާލެއަށް ހިޖުރަކޮށް މާލޭގައި ދިރިއުޅުމުގެ ހަރަދުތައް ބެލެހެއްޓުމަކީ ކޮންމެ ކޮންމެ އާއިލާއަކަށް ކުޅަދާނަ ކަމަކަށް ނުވާނެ. އެހެންވީމަ ރައީސްގެ ސިޔާސަތުގައިވާ ގޮތުގެ މަތިން ދަރިވަރުންނަށް އެ ކުދިންނަށް ރަށުގައި ތިބެގެން ކިޔެވޭނެ ގޮތެއް ފަހިކޮށްދިނުމުގެ މަސައްކަތް ދަނީ ކުރަމުން،"
ވަޒީރު ޝަފީއު ވިދާޅުވިއެވެ.
ވަޒީރު އިތުރަށް ވިދާޅުވީ، ޓީޗަރުންގެ އަގު ވަޒަންކުރެވި، ޓީޗަރުންނަކީ މުޖްތަމައުގެ ތެރޭގައި ގަދަރުވެރި ޝަފަރުވެރި ބައެއްގެ ގޮތުގައި ވެގެންދިއުމަކީ ރައީސް ޑރ.މުޢިއްޒު ވަރަށް އިސްކަން ދެއްވާ ކަމެއް ކަމަށާއި، އެ ވުޒާރާގެ ފަރާތުން ކުރަމުންދާ މަސައްކަތުން ކޮމިއުނިޓީ އެވެއާނަސް ޕްރޮގްރާމްތަކުގެ އިތުރަށް ސްކޫލްތަކުގައި މުދައްރިސުންނަށް ވީހާ ވެސް ފަހި މާހައުލެއް ގާއިމްކުރުމުގެ މަސައްކަތް ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
