މިމަހުގެ 11 ވަނަ ދުވަހު ފުވައްމުލަކު ސިޓީގައި ފެށުމަށް ހަމަޖެހިފައިވާ "ބާބާ ގާޑިޔާ ފުޓްސަލް ޗެލެންޖް 2024" ގެ މީޑިއާ ޕާޓްނަރަކަށް ވޮއިސް ސްޕޯޓްސް ހަމަޖައްސައިފިއެވެ.

މުބާރާތުގެ މީޑިއާ ޕާޓްނަރާއެކު ބޭއްވި ސޮއިކުރުމުގެ ރަސްމިއްޔާތުގައި ވޮއިސް ސްޕޯޓްސްގެ ފަރާތުން ސޮއިކުރެއްވީ ވޮއިސް މީޑިއާ ގުރޫޕްގެ ސީއީއޯ މުހައްމަދު ސައުޒަމް އެވެ. އަދި ބާބާ ގާޑިޔާގެ ފަރާތުން މި އެއްބަސްވުމުގައި ސޮއިކުރެއްވީ އަހުމަދު ނަދީމް އެވެ.

މިމުބާރާތާއި ބެހޭގޮތުން ވޮއިސް ސްޕޯޓްސްއަށް މައުލޫމާތު ދެމުން ބާބާ ގާޑިޔާގެ ވެރިޔާ ހަސަން އަތީޤް (ބާބާ) ބުނީ މިއީ ފުވައްމުލަކު ސިޓީގެ ޒުވާނުންގެ މެދުގައި އެކުވެރިކަމާ އެއްބައިވަންތަކަން އާލަކުރުމުގެ އިތުރުން ދުޅަހެޔޮ މުޖުތަމައެއް ބީނާކުރުމުގެ މަގުސަދުގައި 2023 ވަނަ އަހަރު ބާއްވަން ފެށި މުބާރާތެއް ކަމަށެވެ.

މިއަހަރުގެ މުބާރާތުގައި 12 ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ދެވަނަ ހޯދާ ތިން ޓީމުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

11 ނޮވެމްބަރު 2024 އިން 20 ނޮވެމްބަރު 2024 ގެ ނިޔަލަށް ފުވައްމުލަކު ސިޓީގައި ކުރިއަށްދާ މިމުބާރާތުގެ ޗެންޕިއަން ޓީމަށް 30،000 އަދި ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މިމުބާރާތުގެ އެންމެ ފަހުގެ ޗެންޕިއަން ޓީމަކީ ދަނޑިމަގު ސްޕޯޓްސް ރެކްރިއޭޝަން ކުލަބެވެ.