މޯލްޑިވްސް އިސްލާމިކް ބޭންކުން ދެމުން އަންނަ ބޭންކިންގެ ހިދުމަތް މުޅި ރާއްޖެއަށް ފުޅާކުރުމުގެ ގޮތުން ސަރުކާރާއި އެމްއައިބީ އާ ދެމެދު އެއްބަސްވުމެއް މިއަދު ގާއިމްކޮށްފިއެވެ.

އެންމެ ފާހަގަކޮށްލެވެނީ، މި އެއްބަސްވުމުގެ ދަށުން އެމްއައިބީގެ އޭޓިއެމްތައް ރާއްޖޭގެ މީހުން ދިރިއުޅޭ 19 ރަށެއްގައި ބެހެއްޓުމަށް ނިންމުމެވެ. މިކަމާ ގުޅޭ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިގްތިސާދީ ވަޒީރު، މުހައްމަދު ސައީދެވެ. އެމްއައިބީގެ ފަރާތުން މި އެއްބަސްވުމުގައި ސޮއިކުރެއްވީ، މެނޭޖިން ޑިރެކްޓަރ މުފައްދަލް އިދްރީސް ހުމްރީ އެވެ.

ދެފަރާތުގެ ދެމެދުގައި މިއަދު ވެވުނު އެއްބަސްވުމުގެ ދަށުން އެމްއައިބީން 19 ރަށެއްގައި އޭޓީއެމްތައް ބަހައްޓައި، ފައިސާ ނެގުމާއި އެނޫންވެސް އޭޓީއެމަކުން ލިބޭނެ ޒަމާނީ ހިދުމަތްތައް ދޭނެއެވެ. މި ރަސްމިއްޔާތުގައި ވާހަކަދައްކަވަމުން އެމްއައިބީގެ އެމްޑީ މުފައްދަލް ވިދާޅުވީ، އަތޮޅުގެ ރަށްތަކުގައި އެ އޭޓިއެމްތައް ބެހެއްޓުމާއެކު އަލަށް 16 އަތޮޅަކަށް އެމްއައިބީގެ ހިދުމަތްތައް ދެވިގެންދާނޭކަމަށެވެ.

މޯލްޑިވްސް އިސްލާމިކް ބޭންކުން މިހާރުވެސް ވަނީ ރާއްޖޭގެ މީހުން ދިރިއުޅޭ ރަށްތަކުގައި ޖުމްލަ 39 އޭޓިއެމް ބަހައްޓާފައެވެ. 

މޯލްޑިވްސް އިސްލާމިކް ބޭންކަކީ އިސްލާމިކް ކޯޕަރޭޝަން ފޯރ ދަ ޑިވެލޮޕްމަންޓް އޮފް ދަ ޕްރައިވެޓް ސެކްޓަރ (އައި.ސީ.ޑީ) ގެ %33 ހިއްސާ އާއި، ދިވެހި ސަރުކާރުގެ %28 އިންސައްތަ ހިއްސާ އޮންނަ ބޭންކެކެވެ. މި ބޭންކްގެ އިތުރު ހިއްސާދާރުންނަކީ، މޯލްޑިވްސް ޕެންޝަން އޮފީސް %10.53، އަމާނާ ތަކާފުލް %8.03، އަދި އާއްމުންގެ %10.44 ހިއްސާ ތަމްސީލްކުރާ އާއްމުންނެވެ.