އިދިކޮޅުގައި މައި ޕާޓީ، އެމްޑީޕީ އާ ގުޅިގެން ސިޔާސީ އެއްވެސް މަސައްކަތެއް ނުކުރައްވާނެ ކަމަށް ކުރީގެ ރައީސް އަބްދުالله ޔާމީން މިއަދު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރޮގްރާމުގައި, އެމްޑީޕީއާއެކު ސިޔާސީ ހަރަކާތެއްގައި ބައިވެރިވެވަޑައިގަންނަވާނަންތޯ ކުރެވުނު ސުވާލަށް ޖަވާބުދެއްވަމުން ޔާމީން ވިދާޅުވީ، އެމްޑީޕީގެ ވިސްނުން އެމަނިކުފާނުގެ ވިސްނުންފުޅާ ނުގުޅޭ ކަމަށެވެ. އެހެން ކަމުން އެ ޕާޓީއާއެކު މަސައްކަތް ކުރުމަކީ ވާނޭ ކަމެއް ނޫން ކަމަށެވެ. 

އެމީހުންނާ އެކީ ވާހަކަތަކެއް ދެއްކިދާނެ. އެހެން ނަމަވެސް، އެމީހުންނާއެކީ އެގްރީމަންޓެއް ހަދައިގެން، އެމީހުންނާއެކީ ސިޔާސީ މަސައްކަތްކޮށް، މި ސަރުކާރު ވައްޓާލަން، ސަރުކާރަށް ދެރަދޭން މިކަންކަން ކުރަން، ކޮންމެހެން އަޅުގަނޑު ނެތިން އެމްޑީޕީއާއެކު" ޔާމީން ވިދާޅުވިއެވެ. 

ޔާމީން ވިދާޅުވި ގޮތުގައި، އެމަނިކުފާނު އެމްޑީޕީއަށް އިތުބާރެއް ނުކުރައްވައެވެ. އަދި އެމްޑީޕީ އަކީ ރާއްޖޭގެ ރައްޔިތުންގެ ފައިދާއަށް މަސައްކަތް ކުރާ ޕާޓީއެއް ކަމަށްވެސް ގަބޫލު ނުކުރައްވާ ކަމަށް ވިދާޅުވިއެވެ. 

އެމޑީޕީންވެސް ރަނގަޅު ކަންކަން ކޮށްފައި ހުރި ކަމަށާ، އެހެން ނަމަވެސް، ޖުމްލަކޮށް އެމީހުން ކޮށްފައި ހުރި ކަންކަމަށް ބަލާއިރު، ”ރާއްޖެ އަޅުވެތިވެ، އިންޑިޔާގެ ދަށުވެ ހުރިހާ ކަމެއް ހަލާކުވެގެން ދިޔުމަކީ“ އެމްޑީޕީ ސަރުކާރުން ޒިންމާ ނަގަންޖެހޭ ކަމެއް ކަމަށް ވިދާޅުވުއެވެ.