ޗައިނާ ސަރުކާރުން ދިވެހިރާއްޖެއަށް 80 ކޮންޕިއުޓަރާއި 20 ލެޕްޓޮޕް ހަދިޔާކޮށްފިއެވެ.

ޗައިނާ ސަރުކާރުން ހަދިޔާކުރި އާލާތްތަކާ ހަވާލުވުމަށް ދިވެހި ޚާރިޖިއްޔާއާއި ރާއްޖޭގައި ހުންނަ ޗައިނާގެ އެމްބަސީއާ ދެމެދު ވެވުނު އެއްބަސްވުމުގައި ޚާރިޖީ ވުޒާރާގެ ފަރާތުން ސޮއިކުރެއްވީ ވަޒީރު ޑރ. ޢަބްދުالله ޚަލީލެވެ. އަދި އެމްބަސީގެ ފަރާތުން ސޮއިކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިންއެވެ.

މި ރަސްމިއްޔާތުގައި ވާހަކަފުޅުދައްކަވަމުން ޚާރިޖީ ވަޒީރު ޚަލީލް ވަނީ، ޗައިނާގެ ފަރާތުން ލިބޭ އެފަދަ އެހީއަކީ ދެ ޤައުމުގެ ދެމެދުގައި އުފެދިފައިވާ ގާތްގުޅުމުގެ ރަމްޒެއް ކަން ފާހަގަކުރައްވައި މިފަދަ އެހީތައް ރާއްޖެއަށް ފޯރުކޮށްދިނުމުގައި ޗައިނާގެ ސަފީރުކުރައްވާ މަސައްކަތަށް ޝުކުރު އަދާކުރައްވާފައެވެ.

މި ރަސްމިއްޔާތުގައި ވާހަކަދައްކަވަމުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިން ވިދާޅުވީ ރާއްޖެއާއި ޗައިނާއާ ދެމެދު ގުޅުން އުފެދިފައިވަނީ އިޙްތިރާމުގެ މައްޗަށް ކަމަށެވެ.

އަދި ކުރިއަށް އޮތް ތަނުގައިގައިވެސް އެ ގައުމުގެ ފަރާތުން ރާއްޖޭގެ އެކި ދާއިރާތަކުގެ މީހުން ތަންރީނު ކުރުމުގެ ޕްރިގްރާމްތައް ކުރިއަށް ގެންދަން ހަމަޖެހިފައިވާކަން ފާހަގަކުރެއްވިއެވެ.

."1000 ސިވިލް ސަރވަންޓުން ޗައިނާއަށް ގެންގޮސް ތަމްރީންކުރަން ހަމަޖެހިފައިވޭ. އަދި އެކި ދާއިރާތަކުން މީހުން ޗައިނާއަށް ގެންގޮސް ތަމްރީންކުރަން ވަނީ ހަމަޖެހިފައި. އަދި ރާއްޖޭގައި އެތުލީޓުން ތަމްރީންކުރުމަށްވެސް ހަމަޖެހިފައިވޭ." ސަފީރު ވިދާޅުވިއެވެ.

ޗައިނާ ސަރުކާރުން ދިވެހި ސަރުކާރަށް ހަދިޔާކޮށްފައި ވަނީ ލެނޮވޯ ބްރޭންޑްގެ އާލާތްތަކެކެވެ.