ސިއްހީގޮތުން ދުޅަހެޔޮ މުޖުތަމައުއެއް ބިނާކުރުމަށާއި، މުޖުތަމައުގައި ސިއްހީ އާދަތަކަށް ހޭލުންތެރިކުރުވުމުގެ މަގްސަދުގައި ކުރިއަށްގެންދާ "ހެލްތު އެކްސްޕޯ 2024" ފަށައިފިއެވެ.

ހެލްތް އެކްސްޕޯ ޝަރަފްވެރިކޮށްދެއްވީ ނައިބުރައީސް ހުސައިން މުހައްމަދު ލަތީފެވެ. އެމަނިކުފާނުގެ އަރިހުގައި ސިއްހަތާ ބެހޭ ވަޒީރު އަބްދުﷲ ނާޒިމް އާއި، ހާރިޖީ ވަޒީރު، ޑރ.ޢަބްދުﷲ ހަލީލް ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ވަނީ ސިއްހީ ދާއިރާގެ ހަފްތާ 52 ގެ މަސައްކަތާ ގުޅޭގޮތުން ސަރުކާރުން ތައްޔާރުކޮށްފައިވާ ހާއްސަ ފޮތް ނެރެފައެވެ.

ހެލްތު އެކްސްޕޯ ހުޅުވުމުގެ ރަސްމިއްޔާތުގައި ވާހަކަދައްކަވަމުން ސިއްހަތާ ބެހޭ ވަޒީރު އަބްދުﷲ ނާޒިމް ވިދާޅުވީ އަދުގެ ސަރުކާރުގެ ސިއްހީ ދާއިރާގެ ސިޔާސަތަކީ ދެމެހެއްޓެނިވި ގޮތެއްގައި ރައްޔިތުންނަށް، ބޭސްފަރުވާއަށް ސަލާންޖަހަން ނުޖެހޭ ގޮތަށް ހިދުމަތް ފޯރުކޮށްދިނުންކަމަށެވެ. އަދި ހަމަ އެހެންމެ ބޭސްފަރުވާއަށް މާލެ އަންނަން ނުޖެހި ރައްޔިތުންނަށް ރަނގަޅު ސިއްހީ ހިދުމަތެއް ދިނުންކަމަށެވެ.

މިނިސްޓަރު ވިދާޅުވީ ހެލްތް އެކްސްޕޯ މީގެފަހުން ކޮންމެ އަހަރަކުވެސް ބާއްވާނޭ ކަމަށެވެ. މިގޮތުން އަހަރަކަށްވުރެ އަހަރެއް އެކްސްޕޯ ތަރައްޤީކުރާނޭކަމަށްވެސް މިނިސްޓަރު ފާހަގަކުރެއްވިއެވެ.

ހުޅުމާލޭ ސެންޓްރަލް ޕާކުގައި ދެދުވަހުގެ މުއްދަތަކަށް ކުރިއަށްގެންދާ މި އެކްސްޕޯގައި ސިއްހީ ވުޒާރާގެ އިތުރުން ހޮސްޕިޓަލްތަކާއި އެނޫންވެސް ސިއްހީ ހިދުމަތްދޭ ތަންތަނުނުގެ އިތުރުން މަދަނީ ޖަމިއްޔާތަކުން ވަނީ ބައިވެރިވެފައެވެ. އެކްސްޕޯގައި ޖުމްލަ 50 ސްޓޯލް ހުންނާނެއެވެ. މި އެކްސްޕޯ ގައި ތަފާތު އުމުރުފުރާތަކުގެ މީހުންގެ އިތުރުން ރާއްޖޭގައި އުޅޭ ބިދޭސީންނާއި ކުޑަކުދިންނަށްވެސް ބައިވެރި ވެވޭނޭކަމަށް ހެލްތު މިނިސްޓްރީން ބުނެއެވެ. 

މިއެކްސްޕޯގައި ކުޑަކުދިންގެ ހެލްތް ޗެކަޕްގެ އިތުރުން، މިންހެޔޮ ކާނާ އާއި ވެކްސިނާ ގުޅޭގޮތުންވެސް މައުލޫމާތު ފޯރުކޮށްދިނުމަށް ވަނީ ހަމަޖެހިފައެވެ.