ޔުއެފާ ޔުރޮޕާ ލީގުގައި މިރޭ އަމިއްލަ ދަނޑުގައި ގްރީސްގ ޕައޯކް އަތުން 2-0 ނަތީޖާއަކުން މެންޗެސްޓާ ޔުނައިޓެޑް މޮޅުވިއިރު، ރަށުން ބޭރުގައި ތުރުކީގެ ގަލަތަސަރާއީ އަތުން ޓޮޓެންހަމް ބަލިވީ 2-3 ގެ ނަތީޖާއަކުންނެވެ. 

މީގެ އިތުރުން 2023 ވަނަ އަހަރުގެ އޮކްޓޯބަރު މަހު ޔުއެފާ ޗެންޕިއަންސް ލީގު ގުރޫޕް ސްޓޭޖުގައި ޑެންމާކްގެ ކޮޕަންހޭގަން އަތުން މޮޅުވި ފަހުން ޔުއެފާ ކުލަބު މެޗެއްގައި މެންޗެސްޓާ ޔުނައިޓެޑް މޮޅުވި ފުރަތަމަ މެޗުގައި އެޓީމުގެ ދެލަނޑުވެސް ކާމިޔާބުކޮށްދިނީ އައިވަރީކޯސްޓްގެ ޒުވާން ފޯވާޑް އަމަޑް ޑިއާލޯ އެވެ.

އަމިއްލަ ދަނޑުގައި ޓޮޓެންހަމް އަތުން ގަލަތަސަރާއީ މޮޅުވި މެޗުގައި އެޓީމުގެ ނައިޖީރިއާ ފޯވާޑް ވިކްޓަރ އޮސިމެން ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ ތުރުކީގެ ފޯވާޑް ޔޫނުސް އަކްގުން އެވެ. އަދި މިއާއެކު މިސީޒަނުގެ ޔުރޮޕާ ލީގުގައި ޓޮޓެންހަމް ދަމަހައްޓަމުންއައި މޮޅުވުމުގެ ސިލްސިލާ ވަނީ މިމުމަކަށް އައިސްފައެވެ.

މިނަތީޖާއެކު ކުޅުނު ހަތަރު މެޗުން މެންޗެސްޓާ ޔުބައިޓެޑަށް ހަ ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލުގެ 15 ވަނައިގައެވެ. އަދި ހަތަރު މެޗުން ލިބުނު ނުވަ ޕޮއިންޓާއެކު ލީގު ތާވަލުގެ ހަތް ވަނައިގައި ޓޮޓެންހަމް އޮތްއިރު، ހަތަރު މެޗުން ލިބުނު 10 ޕޮއިންޓާއެކު ގަލަތަސަރާއީ ވަނީ ލީގު ތާވަލުގެ ތިންވަނައަށް ކުރިއަށްޖެހިލާފައެވެ. އަދި ޔުނައިޓެޑް އަތުން ބަލިވި ޕައޯކް ކުޅުނު ހަތަރު މެޗުން ލިބުނު އެއް ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ 33 ވަނައިގައެވެ.

ޔުއެފާ ޔުރޮޕާ ލީގުގައި މިއަހަރު ޖުމްލަ 36 ޓީމަކުން ވާދަކުރަމުން އަންނައިރު، މިއަހަރުގެ މުބާރާތް ކުރިއަށްދަނީ ފުރަތަމަ ރައުންޑުގައި ލީގު އުސޫލުން ކޮންމެ ޓީމަކުން ވެސް ތަފާތު އަށް ޓީމާއެކު ރަށުން ބޭރުގައި ހަތަރު މެޗު، އަދި އަމިއްލަ ދަނޑުގައި ހަތަރު މެޗު ކުޅުމަށްފަހު އެންމެ ރަނގަޅު ނަތީޖާއެއް ހޯދާ އަށް ޓީމަށް މުބާރާތުގެ ރައުންޑް އޮފް 16 އިން ޖާގަ ލިބޭ ގޮތަށެވެ. އަދި ލީގުބުރުގެ ގަދަ އަށް ޓީމުގެ އިތުރުން ދެން އެންމެ ނަތީޖާ ރަނގަޅު 16 ޓީމުގެ މެދުގައި ޕްލޭއޮފް މެޗުތަކެއް ކުޅެ ކުރިހޯދާ އަށް ޓީމަށް މުބާރާތުގެ ރައުންޑް އޮފް 16 ގެ ފަހު އަށް ޖާގަ ލިބިގެންދާނެއެވެ.