ގާނޫނަށް ގެންނަންޖެހޭ ބަދަލު ގެނެސް، ގޭންގާއި މަސްތުވާތަކެތީގެ އައްޑާގެ ގޮތުގައި ބޭނުންކުރާ ތަންތަން ދައުލަތަށް ނަގާނެ ކަމުގެ އިންޒާރު ހޯމް މިނިސްޓަރު އަލީ އިހުސާން ރޭ ދެއްވައިފިއެވެ.

ހުޅުމާލެ ދެވަނަ ފިޔަވަހީގެ ހިޔާ ޓަވަރު ނުވައެއްގައި ރަހީނުކޮށްފައި ހުރި މީހަކު ފުލުހުން ރޭ ސަލަމާތްކޮށްފައިވާއިރު، އެ ހާދިސާއާ ގުޅިގެން މީޑިއާތަކަށް މައުލޫމާތުދެއްވައި މިނިސްޓަރު އިހުސާން ވިދާޅުވީ، ރޭ އިރާކޮޅު މީހަކު ރަހީނުކޮށްގެން އުޅޭ ކަމަށް އިންޓެލިޖެންސްއަށް މައުލޫމާތު ލިބުމާއެކު، އެ ޔުނިޓާއި އެހެނިހެން ބަހާތަކާއި ގުޅިގެން، ހިންގުނު އޮޕަރޭޝަނެއްގައި އެ މީހާ ސަލާމަތްކުރި ކަމަށެވެ.

މިއާއެކު އިހްސާން ވަނީ އެފަދަ ކަންކަން ކުރުން ހުއްޓާލުމަށް ގޭންގުތަކަށް ގޮވާލައި، އެފަދަ ކުށްތައް ކުރާ ފަރާތްތަކަށް ގާނޫނުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅުއްވާނެ ކަމަށް ވިދާޅުވެފައެވެ.

އިހްސާން އިތުރަށް ވިދާޅުވީ ބައެއް ފުލެޓުތަކާއި އެ ނޫންވެސް ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ފާހަގަކުރެވޭ ކަމަށެވެ.

”މިހާރުވެސް ބައެއް ފުލެޓް ތަކަކީ ކުށްކުރާ މީހުންގެ ހާއްޔަކަށް ބޭނުންކޮށްގެން އުޅޭ ތަންތަން. “

އެހެންކަމުން، މިއަދުން ފެށިގެން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އާއެކު އެ ފުލެޓުތަކުގެ ވެރިންނާ ވާހަކަދެއްކުމުގެ މަސައްކަތް ފައްޓަވާނެ ކަމަށާ އަދި ކުށްކުރުމުގެ މާހައުލަށް އެތަންތަން ތަކުރާރުކޮށް ހުޅުވާލާފައި އޮންނަނަމަ އެ ތަންތަން އަނބުރާ ދައުލަތަށް ނެގޭނެ ގޮތެއް ހޯދާނެ ކަމަށެވެ. އަދި ގޭންގު ގާނޫނަށް ހުށަހަޅަން ނިންމަވާފައިވާ އިސްލާހް ތަކުގެ ތެރޭގައި އެކަންވެސް ހިމެނޭ ކަމަށް ވިދާޅުވިއެވެ. 

މީގެ އިތުރުން މަސްތުވާތަކެތިގެ ގާނޫނަށް ގެންނަން ނިންމަވާފައިވާ އިސްލާހުތަކުގެ ތެރޭގައި ތަކުރާރުކޮށް މަސްތުވާތަކެތި ބޭނުންކޮށް އެ ތަނަކީ އައްޑާއެއްގެ ގޮތުގައި ބޭނުންކުރަމުން އަންނަ ތަނެއް ކަމުގައި ވާނަމަ ވެސް އެ ތަންތަން ދައުލަތަށް ނެގޭނެ ގޮތެއް ހޯދުން ހިމެނޭ ކަމަށް އިހުސާން ވިދާޅުވިއެވެ.

އިހުސާން ވިދާޅުވީ ހިޔާ ފުލެޓް ސަރަހައްދަކީވެސް ގިނަ އަދަދެއްގެ މީހުން އުޅެމުންދާ ސަރަހައްދެއް ކަމަށް ވުމާއެކު ރައްޔިތުންގެ ސަލާމަތާއި ރައްކާތެރި ކަމަށްޓަކައި، ކަންކަން ފަށާފައިވާ ކަމަށެވެ. އެގޮތުން ކެމެރާ ހަރުކުރުމާއި ފުލުހުންގެ އޮޮަޕަރޭޝަން ސެންޓަރު ތަކުން އެ ކެމެރާތައް ބެލޭނެ އިންތިޒާމް ހަމަޖައްސަވަމުންދާކަމަށް ވިދާޅުވިއެވެ.