ހުޅުމާލެ ހޮސްޕިޓަލުގައި ކުރިއަށްގެންދާ "އައި ކޭމްޕް" ގައި ޗައިނާގެ ޑޮކްޓަރުންގެ ޓީމުން 3 ދުވަސްތެރޭގައި 60 އެއްހާ ސާޖަރީ ފުރިހަމަކޮށްފިއެވެ.

މިއީ ޗައިނާ ސަރުކާރުގެ އިސްނެގުމުގެ މަތިން ޗައިނާގެ ލޮލުގެ ޑޮކްޓަރުން ރާއްޖެއަށް ކުރާ ޒިޔާރަތެކެވެ.

މި ކޭމްޕް ކުރިއަށް ގެންދާ ގޮތް ބަލާލުމަށާއި ފަރުވާ ހޯދާ މީހުންނާ ބައްދަލުކުރެއްވުމަށް ސިއްޙަތާ ބެހޭ ވަޒީރު ޢަބްދުﷲ ނާޒިމް ހޮސްޕިޓަލަށް އިއްޔެ ޒިޔާރަތް ކުރައްވާފައިވާއިރު، މި ޒިޔާރާތުގައި ޗައިނާ ސަފީރު ވާން ލިޖިންގެ އިތުރުން ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމްވެސް ބައިވެރިވެވަޑައިގެންނެވިއެވެ.

މި ކޭމްޕާއި ގުޅޭގޮތުން ޗައިނާ ސަފީރު ވާން ލިޖިން ވިދާޅުވީ، ވޭތުވެދިޔަ ތިން ދުވަހުގެ ތެރޭ ޗައިނާގެ ޓީމުން 60 އެއްހާ ސާޖަރީ ހަދައި، ދިވެހިންނަށް ފަރުވާ ދީފައިވާކަމަށާއި، ރާއްޖެއާއި ޗައިނާ ގުޅުމުގެ ސަބަބުން ދިވެހި ރައްޔިތުންނަށް ފައިދާތަކެއްވާތީ އުފާކުރައްވާކަމަށެވެ.

ލޮލުގެ އެކި ބަލިތަކަށް ފަރުވާ ދިނުމުގެ އިތުރުން ލެންސު ނުސާފު ވެފައިވާ މީހުންނަށް ހާއްސަ ސާޖަރީތަކެއް ހެދުމުގެ ހިދުމަތްވެސް މި ކޭމްޕުން ދެމުން އަންނަކަން ފާހަގަކޮށްލަން ޖެހެއެވެ.

2016 އިން ފެށިގެން ސިލްސިލާ ގޮތެއްގައި ކުރިއަށްގެންދާ މި ކޭމްޕްގެ ހަރަކާތް މި މަހުގެ 5 ވަނަ ދުވަހު ފަށާފައިވާއިރު، ވޭތުވެދިޔަ އަހަރުތަކުގައި މި ކޭމްޕުތައް މެދުވެރިކޮށް 5،000 އަށްވުރެ ގިނަ މީހުންނަށް ފަރުވާދީ 600 އަށްވުރެ ގިނަ މީހުންގެ ލޮލުގެ ސާޖަރީ ހަދާފައެވެ.