އިހަވަންދިއްޕޮޅުގައި ގާއިމްކުރާ އިކޮނޮމިކް ގޭޓްވޭ މަޝްރޫއު ތަރައްޤީ ކުރުމުގެ ފްރޭމްވަރކް އެއްބަސްވުން، ސިންގަޕޫރުގެ ކުންފުންޏަކާ އެކު ސަރުކާރުން ޤާއިމްކޮށްފިއެވެ.

މޯލްޑިވްސް އިކޮނޮމިކް ގޭޓްވޭ މަޝްރޫއު ކުރިއަށް ގެންދިޔުމުގެ މި އެއްބަސްވުން، މޯލްޑިވްސް އިންޑަސްޓްރިއަލް ފްރީޒޯނުން ގާއިމްކޮށްފައިވަނީ ސިންގަޕޫރުގެ ކެޕިޓަލް އޭޝިއާ އިންވެސްޓްމަންޓާ އެކުގައެވެ.

މި އެއްބަސްވުމުގައި މޯލްޑިވްސް އިންޑަސްޓްރިއަލް ޑެވެލޮޕްމެންޓް ފްރީ ޒޯން (އެމްއައިޑީއެފްޒެޑް)ގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޝިމާދު އިބްރާޙިމެވެ. ކެޕިޓަލް އޭޝިއާ އިންވެސްޓްމެންޓް (ސީއައިއޭ)ގެ ފަރާތުން ސޮއިކުރެއްވީ އެ ކުންފުނީގެ ޗީފް ކޮމަރޝަލް އޮފިސަރު ޓަން ކުން ޗީއާއޯ ޖޯޖް އެވެ.

މި އެއްބަސްވުމާއި ގުޅޭގޮތުން، އިގްތިޞާދީ ތަރައްގީއާއި ވިޔަފާރިއާއި ބެހޭ ވުޒާރާއިން ބުނީ، މި އެއްބަސްވުމަކީ ރާއްޖޭގެ އިގްތިޞާދު ސިންދަފާތު ކުރުމަށް ރައީސް ޑރ. މުހައްމަދު މުއިއްޒުގެ ތަސައްވުރާއި އެއްގޮތްވާގޮތުގެ މަތިން މޯލްޑިވްސް އިކޮނޮމިކް ގޭޓްވޭ މަޝްރޫއު ކުރިއަށްގެންދިއުމަށް ސޮއި ކުރި އެއްބަސްވުމެއް ކަމަށެވެ.

އެވުޒާރާއިން ބުނީ، މި ފްރޭމްވޯކް އެއްބަސްވުމުގެ ދަށުން، އިހަވަންދިއްޕޮޅު ސަރަހައްދު، ވިޔަފާރި އާއި ލޮޖިސްޓިކްސް ހަބަކަށް ބަދަލު ކުރުމަށް ސަރުކާރުން ރާވާފައިވާ ޕްލޭނާއި އެއްގޮތަށް، އެ މަޝްރޫއުގެ ސްކޯޕާއި ފިޔަަވަހިތައް ތަރައްގީ ކުރުމަށް ބޭނުންވާ ޕްލޭން އެކުލަވާލެވޭނެކަމަށެވެ.

ހަމައެއާއިއެކު، ފައިނޭންޝަލް އެސެސްމެންޓް ހެދުމާއި، މަޝްރޫއު ކުރިއަށް ގެންދިއުމަށް ބޭނުންވާ މުހިންމު ކޮމާރޝަލް ޓަރމްސް ކަނޑައެޅުމަށް ދެ ފަރާތުން ގުޅިގެން މަސައްކަތް ކުރެވޭނެ ކަމަށްވެސް އިގްތިޞާދާއި ބެހޭ ވުޒާރާއިން ހާމަކުރެއެވެ.

މިއީ ދެމެހެއްޓެނިވި އަސާސްތަކާއި އެއް ހަމަ ކުރެވިގެން، އިޖްތިމާއީ ގޮތުން ޒިންމާދާރު، ދިގު މުއްދަތަކަށް ލާބަ އާއި މަންފާ ލިބެނިވި އަދި ރާއްޖެއަށް އިގްތިޞާދީ ކުރިއެރުން ލިއްބައިދޭނެ މަޝްރޫއެއްކަމަށް އެ ވުޒާރާއިން ބުނެއެވެ.