އެކްސްޓްރާ އޯޑިނަރީ ޖޮއިންޓް އަރަބިކް އިސްލާމިކް ސަމިޓުގައި ބައިވެރިވެވަޑައިގަތުމަށް ޚާރިޖީ ވަޒީރު ޑރ.އަބްދުﷲ ޚަލީލް ސައުދީ އަރަބިއާ އަށް ފުރާވަޑައިގެންފިއެވެ.

މިއީ އަރަބި ލީގާއި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގުޅިގެން މިމަހުގެ 11 ވަނަ ދުވަހު ސަޢޫދީއަރަބިއްޔާގެ ރިޔާދުގައި ބޭއްވުމަށް ހަމަޖެހިފައިވާ ސަމިޓެކެވެ.

މި ބައްދަލުވުމާއި ގުޅޭގޮތުން ވަޒީރު ޑރ.ޚަލީލް އެކްސްގައި ކުރެއްވި ޕޯސްޓެއްގައި ވިދާޅުވީ، މި ދަތުރުފުޅުގައި އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓާއި އެ ސަމިޓަށް ތައްޔާރުވުމުގެ ބައްދަލުވުންތައްގައި ބައިވެރިވުމަށް ހަމަޖެހިފައިވާކަމަށެވެ.

Advertisement

މީގެ އިތުރުންވެސް،  މެދުއިރުމަތި އަދި މުޅި އިސްލާމީ ދުނިޔެއަށް ކުރިމަތިވެފައިވާ ކަންތައްތަކާއި ބެހޭގޮތުން މަޝްވަރާކުރުމަށް ހަމަޖެހިފައިވާކަމަށާއި، އޭގެ ތެރޭގައި ފަލަސްތީނާއި ލުބުނާނުގެ ބިންތަކުގައި އިޒްރޭލުން ހިންގަމުންދާ ޢުދުވާންތަކާއި ދެކޮޅަށް މަސްކަތްކުރުމާއި ގުޅޭ މަޝްވަރާތައް ވެސް ހިމެނޭކަމަށް ވަޒީރު ވިދާޅުވިއެވެ.

ވަޒީރު ޑރ.ޚަލީލްގެ މި ޕޯސްޓްގައި ވަނީ އިސްރާއީލު ޖަވާބުދާރީ ކުރުވުމަށް އެންމެން އެކުގައި މަސައްކަތް ކުރަން ޖެހޭކަމަށް ވިދާޅުވެ، އިޒްރާއީލުން ހިންގަމުންދާ ޢުދުވާންތައް ވަގުތުން ހުއްޓާލުމަށް ގޮވާލައްވާފައެވެ.