މިދިޔަ ބްރާސްފަތި ދުވަހުގެ ރޭ ހުޅުމާލޭ ދެވަނަ ފިޔަވަހީގައި ހުންނަ ހިޔާ ޓަވަރު 9ގެ ފަންގިފިލާއެއްގެ ތެރޭގައި މީހަކު ރަހީނުކުރި މައްސަލާގައި ހިމެނޭ މިހުންގެ ބަންދުގެ މުއްދަތު ޖަހައިފިއެވެ.

ފުލުހުން ބުނީ އެ މައްސަލައިގައި ހިމެނޭ 12 މީހުން ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރުކުރުމުން އެމީހުންގެ ބަންދުގެ މުއްދަތު ޖަހާފައިވާކަމަށެވެ. 

ބްރާސްފަތި ދުވަހުގެ ރޭ ގާތްގަނޑަކަށް 19:40 ހާއިރު ރަހީނުކޮށްފައިވަނީ އެޗް 9 ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓުތެރޭގައެވެ. ފުލުހުން އެތަނަށް ގޮސްފައިވަނީ މީހަކު ކުރި ރިޕޯޓަކާ ގުޅިގެންނެވެ. ފުލުހުންގޮސް އެ އެޕާޓްމަންޓަށް ވަތްއިރު، ރަހީނުކުރި މީހުން ތައްޔާރުވަމުންދިޔައީ، ރަހީނުކުރި މީހާގެ އިނގިލި ބުރިކޮށްލުމަށް ކަމަށް ފުލުހުން ވަނީ ބުނެފައެވެ. އޭރު އެމީހުން ވަނީ ރަހީނުކުރި މީހާގެ ބޯވެސް މުޅިންހެން ބާލާފައެވެ. 

Advertisement

އެ މައްސަލާގައި ފުލުހުން 12 މީހަކު ހައްޔަރުކުރިއެވެ. ފުލުހުން މައުލޫމާތު ދޭ ގޮތުގައި އެ އެޕާޓްމަންޓަކީ ތަފާތު އެކު ކުއްތަށް ހިންގާ ކުށުގެ ހާއްޔެކެވެ. މީގެ ކުރިންވެސް އެ އެޕާޓްމަންޓުން އެފަދަ މައްސަލައެއް ވަނީ ފެންމަތިވެފައެވެ.

މި މައްސަލައާ ގުޅިގެން ދާހިލީ ވަޒީރު އިހްސާން ވަނީ ވަރުގަދަ އިންޒާރެއް ދެއްވާފައެވެ. މިނިސްޓަރު ވިދާޅުވެފައިވަނީ، ސަރުކާރުން ބޯހިޔާވަހިކަމަށް ދޫކޮށްފައިވާ ފްލެޓްތަކުގައި އެބީދައިން ކުއްތަށް ކުރާނަމަ، ޤާނޫނީ އިމުގެ ތެރެއިން އެފަދަ ތަންތަން ދައުލަތުގެ ބެލުމުގެ ދަށަށް ނަގާނޭކަމަށެވެ.