މީގެ ކުރިން އެއްވެސް ސަރުކާރަކުން މިހާތަނަށް އިންޑިއާ ކަނޑުގެ މުއްސަނދިކަމުގެ ބޭނުން ހިފާފައިނުވާކަމަށް އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.
ވަޒީރު ސައީދު މިފަދައިން ވިދާޅުވީ، އިހަވަންދިއްޕޮޅުގައި ތަރައްޤީކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު"ގެ ޕޯޓު ތަރައްޤީކުރުމާއި، މަޝްރޫޢާއި ގުޅުންހުރި އިތުރު މަސައްކަތްތައްކުރުމަށް ސިންގަޕޫރުގެ ކެޕިޓަލް އޭޝިއާ އިންވެސްޓުމަންޓު ކުންފުންޏާއެކު ފްރޭމްވޯކް އެއްބަސްވުމެއްގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ސައީދު ވިދާޅުވީ، އިންޑިއާ ކަނޑުގެ ބޮޑުބައެއް ރާއްޖެ ހިއްސާކުރާކަމަށާއި، މީގެ ކުރިން އައި ސަރުކާރުތަކުން މިކަމާއި މެދު ވިސްނާފައި އޮތް ނަމަވެސް އެއްވެސް ފިޔަވަޅެއް އަޅާފައިނުވާކަމަށެވެ.
ރައީސް ޑރ.މުޢިއްޒު އަކީ ތައުލީމީ ރައީސެއްކަން ފާހަގަކުރައްވަމުން ވަޒީރު ސައީދު ވިދާޅުވީ، އެމަނިކުފާނު ގެންދަވަނީ އައު ކަންކަން ތައާރަފްކޮށް ރާއްޖެ ތަރައްގީ ކުރުމުގެ މަސައްކަތް ކުރައްވަމުން ކަމަށެވެ.
"ކުރީ ސަރުކާރުތަކުންވެސް މިކަމާއި ވިސްނާފައި އޮވެދާނެ، އެހެންނަމަވެސް އެކަމަށް އަޅަންޖެހޭ ފިޔަވަޅުތައް އަޅާފައިނުވޭ،އެހެންނަމަވެސް މިކަމުގައި ރައީސް ޑރ. މުޢިއްޒު ފަހަތަށް ނުޖެހޭނެ"
ވަޒީރު ސައީދު ވިދާޅުވިއެވެ.
ރައީސް ޑރ. މުޢިއްޒުގެ ވިސްނުންފުޅު ހުރީ މި ފުރުޞަތުތަކުގެ ބޭނުން ހިފާ ރާއްޖެ ތަރައްޤީގެ އެހެން ހަރުފަތަކަށް ގެންދިޔުމަށް ކަމަށް ވަޒީރު ސައީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
