ސަރުކާރުން މިއަދު އާބަން ސެންޓަރުތައް ހެދުމަށް ރަށްތައް އިއުލާނުކުރިއިރު، އާބަން ސެންޓަރު ހެދުމަށް ބޮޑު ތިލަދުއްމައްޗާއި ރާއްޖޭގެ ދެކުނު ނުހިމެނި ސަބަބާ ބެހޭގޮތުން އިދިކޮޅު އެންމެބޮޑު ޕާޓީގެ ރައީސް ޢަބްދުﷲ ޝާހިދު ސުވާލު އުފައްދަވައިފިއެވެ.

ސަރުކާރުން މިއަދު ވަނީ އާބަން ސެންޓަރުތައް ތަރައްޤީކުރާނޭ 7 ރަށެއް އިއުލާނުކުރައްވާފައެވެ. އެ ރަށްތަކުގެ ލިސްޓްގައި ބޮޑު ތިލަދުއްމައްޗާއި ރާއްޖޭގެ ދެކުނުގެ އެެއްވެސް ރަށެއް ހިމެނިފައިނުވާތީވެ، ޝާހިދު އެކްސްގައި ކުރެއްވި ޕޯސްޓުގައި ވިދާޅުވީ އަރބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށެވެ.

ޝާހިދު ވިދާޅުވީ މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައިދެކޭ ކަމަށެވެ.

ސަރުކާރުން މިއަދު އާބަންސެންޓަރުތައް ތަރައްޤީ ކުރާނޭ ރަށްތައް އިއުލާނުކޮށްފައިވާއިރު، އެ ރަށްތަކުގެ ތެރެގައި ހިމެނެނީ: 

1) ރ. އުނގޫފާރު

2) ބ. އޭދަފުށި

3) ޅ. ނައިފަރު

4) އދ. މަހިބަދޫ

5) ފ. ނިލަންދޫ

6) ދ. ކުޑަހުވަދޫ

7) ލ. ފޮނަދޫ

ލާމަރުކަޒީ ނިޒާމުން ރާއްޖޭގެ ރަށްތައް ތަރައްޤީކުރުމަކީ އިދިކޮޅު އެމްޑީޕީންވެސް ވަރަށްބޮޑަށް ވަކާލާތު ކުރަމުން އަންނަ ސިޔާސަތެކެވެ. އެމްޑީޕީން ދެކޭގޮތުގައި ރާއްޖެއަށް ލާމަރުކަޒީ ނިޒާމް ތައާރަފްކުރީ އެޕާޓީންނެވެ.

ނަމަވެސް އަދުގެ ސަރުކާރުން ލާމަރުކަޒީ ނިޒާމު ފުނޑާލުމަށް މަސައްކަތް ކުރަމުންދާކަމަށް އެމްޑީޕީން ދަނީ ތުހުމަތުކުރަމުންނެވެ.