އަދުގެ ސަރުކާރުގެ އުމްރާނީ ތަރައްގީގެ ސަރަހައްދީ ތަސައްވުރުގެ ދަށުން އާބަން ސެންޓަރު ތަރައްޤީކުރުމުގައި ދެކުނުގެ އަތޮޅުތައް އެއްކިބާކޮށްފައި ނުވާނޭކަމަށް، ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން ބުނެފިއެވެ.

އާބަން ސެންޓަރުތައް ތަރައްޤީކުރާނެ 7 ރަށެއް ސަރުކާރުން އިއުލާނުކުރުމާއެކު އިދިކޮޅު ސިޔާސީ ފަރާތްތަކުން ދަނީ އެކަމާ ބުޅޭގޮތުން ތަފާތުއެކި ވާހަކަތައް ދައްކަމުންނެވެ. މިގޮތުން ރަށްތައް ކަނޑައަޅައި އިއުލާނުކުރިގޮތުން އިދިކޮޅު އެމްޑީޕީން ވަނީ ސަރުކާރަށް ވަރަށްބޮޑަށް ފާޑުކިޔާފައެވެ. 

ބައެއް ފަރާތްތަކުން ދައްކަމުންދާ ވާހަކަތަކާ ގުޅިގެން ބިނާރާ ބެހޭ ވުޒާރާއިން ނެރުނު ބަޔާނެއްގައި ބުނެފައިވަނީ، ރައީސުލްޖުމްހޫރިއްޔާގެ އުމްރާނީ ތަރައްޤީގެ ތަސައްވުރަކީ ރާއްޖޭގެ އުތުރުގެ ހަތަރު ހިމެނޭހެން އުތުރުގެ އުމްރާނީ ތަރައްޤީގެ ސަރަހައްދަކާއި ރާއްޖޭގެ ދެކުނުގެ ހަތަރު އަތޮޅު ހިމެނޭހެން އުމްރާނީ ތަރައްޤީގެ ސަރަހައްދެއް ތަރައްޤީކުރުމެވެ.

މިގޮތުން އާބަންސެންޓަރު ތަރައްޤީކުރުމަށް ރާވާފައިވާ ސަރަހައްދުތަކުގެ ތެރޭގައި ދެކުނުގެ އަތޮޅުތަކުގެ ތެރޭގައި ހުވަދުއަތޮޅު އުތުރުބުރި، ހުވަދު އަތޮޅު ދެކުނު ބުރި، ފުވައްމުލައް ސިޓީ އަދި އައްޑޫސިޓީ ހިމެނޭކަން ބިނާރާބެހޭ ވުޒާރާއިން ވަނީ ފާހަގަކޮށްފައެވެ.

މިނިސްޓްރީން ބުނީ، ދެކުނު އަތޮޅުތަކުގައިވެސް އެކި ރަށްރަށް އާބާދީއާއި ތަރައްގީ އެއްފަސްކުރުމުގެ ސިޔާސަތުގެ ދަށުން އާބަން ސެންޓަރުތަކުގެ ގޮތުގައި ތަރައްގީކުރެވޭނޭ ކަމަށެވެ. 

ބިނާރާބެހޭ ވުޒާރާއިން ބުނީ ރައްޔިތުންނަށް އޮޅުންއަރާފަދަ ގޮތަކަށް މިކަމުގައި ހަބަރުތައް ފަތުރަމުންދާކަމަށް ފާހަގަކުރެވޭ ކަމަށާއި، އާބަން ސެންޓަރުތައް ތަރައްޤީކުރާނެ 7 ރަށް މިއަދު އިއުލާނުކޮށްފައި އެވަނީ، ދެކުނުގެ އަތޮޅުތައް އިސްތިސްނާ ނުވާނޭ ގޮތަށްކަމަށެވެ.

އާބަން ސެންޓަރުތަކުގެ ގޮތުގައި 7 ރަށެއް އިއުލާނުކުރުމުން އެކަމާ ބައެއް ސިޔާސީފަރާތްތަކުން ފަތުރަމުންގެންދާ ވާހަކަތަކަށް ރައްދުދެއްވަމުން ރައީސް ޑރ.މުއިއްޒު ވިދާޅުވެފައިވަނީ، އާބަން ސެންޓަރުގެ ގޮތުގައި ސަރުކާރުން ކަނޑައެޅި ރަށްތައް ތަރައްގީކުރާނީ ރައްޔިތުންގެ ފުރިހަމަ ބައިވެރިވުމާއެކު ކަމަށެވެ. އެކަމަށް ތައްޔާރުކުރާ މާސްޓަރޕްލޭން ތައްޔާރުކުރާނީ ރައްޔިތުންގެ ހިޔާލު ހޯދުމަށްފަހުކަމަށް ރައީސް ވަނީ ވިދާޅުވެފައެވެ.