ސަރުކާރުން ފަށާފައިވާ 5 މިލިއަން ގަސް މަޝްރޫއުގެ ދަށުން މޯލްޑިވްސް އިސްލާމިކް ބޭންކް (އެމްއައިބީ) އިން  މާލެ ސަރަހައްދުގެ ރައްޔިތުން ދަތުރު ދިޔުމަށް ހާއްސަ ކޮއްފައިވާ ކ.ކުޑަގިރީގައި 1،000 ގަސް އިންދައިފިއެވެ.

މިކަމާއި ގުޅޭގޮތުން މައުލޫމާތު ދެމުން އެމްއައިބީން ބުނީ، މި ހަރަކާތް ރާވާ އިންތިޒާމުކުރުމުގައި ހަރަކާތްތެރިވެފައިވަނީ ކްލީން މޯލްޑިސް ޖަމިއްޔާއިން ކަމަށާއި، އެޗްޑީސީއާއި އެމްޓީސީސީ، އޭޝިއާ ފޯވަޑިން، އައިކެއަރ، މޯލްޑިސް ޕޮލިސް ސާވިސް އަދި ދަ ހޯކްސް ޕްރައިވެޓް ލިމިޓެޑުން ޕާޓްނަރުންގެ ގޮތުގައި ބައިވެރިވިކަމަށެވެ.

މި ހަރަކާތުގައި އެޗްޑީސީގެ ފަރާތުން ލިބުނު އެހީތެރިކަމަކަން ފާހަގަކުރަމުން އެމްއައިބީއިން ބުނީ، އެ ބޭންކުން ކުރިއަށް ގެންދިޔަ ގަސް އިންދުމުގެ ހަރަކާތުގައި ގިޔާސުއްދީން ސްކޫލްގެ ގިނައަދަދެއްގެ ދަރިވަރުންނާއި ބެލެނިވެރިން ބައިވެރިވިކަމަށެވެ.

މިގޮތުން، މި ހަރަކާތް ރަސްމީކޮށް ފައްޓަވައި ދެއްވަމުން ޝަރަފުވެރި މެހެމާން، އެމްއައިބީގެ ސީއީއޯ މުފައްދަލް އިދްރީސް ހުމްރީ ވަނީ ތިމާވެށި ހިމާޔަތް ކުރުމަކީ ކޮންމެ ކުއްޖެއްގެވެސް ފަރުދީ ޒިންމާއެއްކަމަށް ދެކިގެން ކުރިޔަށް ދިޔުމަށް ނަސޭހަތްތެރިވެލައްވާފައެވެ.

އެމްއައިބީއަކީ އިޖްތިމާއީ ކަންކަމަށް ބޮޑެތި ހޭދަތަކެއް ކުރަމުންދާ ކުންފުންޏަކަށްވާއިރު، ޒަމާނީ ވަސީލަތްތަކުގެ އެހީގައި ބޭންކިން ހިދުމަތްދެމުން އަންނަ މި ކުންފުންޏަކީ ރާއްޖޭގައި އެންމެ ހަލުވިކަމާއިއެކު ކުރިއަރަމުން އަންނަ ބޭންކުކަން ފާހަގަކޮށްލެވެއެވެ.