ރައީސް ޑރ. މުހައްމަދު މުއިއްޒުގެ މެނިފެސްޓޯގައި ވަރަށް ސާފުކޮށް ބަޔާން ކުރައްވާފައިވާ ކަންކަން، ވެރިކަމަށް ވަޑައިގަތުމަށް ފަހު ކުރައްވަމުން ގެންދަވަނީ ސީދާ ދިމާ އިދިކޮޅަށް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް މިއަދު ވިދާޅުވެއްޖެއެވެ.

ފައްޔާޒު މިހެން ވިދާޅުވީ، ސަރުކާރުން ރާއްޖޭގެ ހަތް ސަރަހައްދެއްގައި އާބަން ސެންޓަރެއް ގާއިމު ކުރަން ނިންމައި، އެކަން އިއުލާން ކުރުމުން އެކަމާއި ދޮކޮޅަށް ވާހަކަތައް ފަތުރަމުންދާތީ ރައީސް މުޢިއްޒު ކުރެއްވި ޕޯސްޓަކަށް ރައްދުދެއްވައި ކުރެއްވި ޕޯސްޓެއްގައެވެ.

އެގުތުން ރައީސްގެ ޕޯސްޓަށް ރައްދުދެއްވައި ފައްޔާޒު ވިދާޅުވެފައިވަނީ ވެރިކަމަށް ވަޑައިގަތުމަށް ފަހު ރައީސް ކަންކުރައްވަމުން ގެންދަވަނީ ސީދާ އެ މަނިކުފާނު ވިދާޅުވިގޮތާ އަދި މެނިފެސްޓޯގައި ލިޔެފައިވާ ގޮތާ ވެސް ޚިލާފަށް ކަމަށެވެ.

އަދު ރާއްޖޭގެ ހަތް ސަރަހައްދެއް އާބަން ސެންޓަރުތަކުގެ ގޮތުގައި ތަރައްގީކުރަން ސަރުކާރުން ނިންމީ، ރައްޔިތުންގެ ޚިޔާލު ހޯދުމެއް ނެތި ކަމަށެވެ. 

ފައްޔާޒު އިތުރަށް ވިދާޅުވި ގޮތުގައި މި ސަރުކާރުން އެކުލަވައިލާ ގައުމީ ތަރައްގީގެ 20 އަހަރުގެ މާސްޓަ ޕްލޭނާ އެއްގޮތަށް ވެސް ކަންކަން ނުކުރައްވާނެކަން ރައްޔިތުންނަށް މިއަދު ޔަގީންވެއެވެ. އަދި ރައީސް މުއިއްޒު ހުއްޓުމެއް ނެތި ހުސް އިތުރުފުޅު ހައްދަވަމުން ގެންދަވާ ކަމަށްވެސް ތުހުމަތު ކުރެއްވިއެވެ. 

ރައީސް މުޢިއްޒުގެ ޕޯސްޓުގައި އެމަނިކުފާނު ވަނީ، ސަރުކާރުގެ މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައިވެސް އެމަނިކުފާނު ވަނީ، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަން ގެ އިތުރުން އެންމެ މަތީ ފަންތީގެ ޚިދްމަތްތައް ހިމެނޭހެން، އެންމެ އުތުރުގެ 3 އަތޮޅު ހިމެނޭހެން ނޮރދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ 4 އަތޮޅު ހިމެނޭހެން ސަރދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުން ކަން ފާހަގަކުރައްވާފައެވެ.

އަދި އޭގެ އިތުރަށް 7 އަރބަން ސެންޓަރު (މާލެއިން އުތުރުން 3، މާލެއިން ދެކުނުން 4) ތަރައްޤީ ކުރުން އެއީ ސަރުކާރުގެ ސިޔާސަތު، ކަމަށާ މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްޤީގެ މާސްޓަރޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ޤަސްދުކުރާ ކަންކަން ކަމަށްވެސް ވިދާޅުވިއެވެ.