އަދުގެ ސަރުކާރުގެ ބޯހިޔާވަހިކަމުގެ އެންމެ ބޮޑު މަޝްރޫޢުކަމަށްވާ "ރަސްމާލެ" ހިއްކުމުގެ މަސައްކަތުގެ ދަށުން އެފް އޭރިއާ ހިއްކުމުގެ މަސައްކަތް ފަށައިފިއެވެ.

އެޗްޑީސީން މިއަދު ބުނީ ރަސްމާލެ ހިއްކުމަށް ހަމަޖެހިފައިވާ ސަރަހައްދުތަކުގެ ތެރެއިން އެފް އޭރިއާ ހިއްކުމުގެ މަސައްކަތް މިއަދު ފަށައިގެން ކުރިއަށްދާކަމަށެވެ. ރަސްމާލެ ހިއްކުމުގެ މަސައްކަތް 12 ސަރަހައްދަކަށް ބަހާލައިގެން ކުރިއަށްގެންދިއުމަށް ނިންމާފައިވާއިރު، އޭރިއާ "ޖޭ" ގައި ހިއްކަންޖެހޭ ސަރަހައްދު އެއްކޮށް ހިއްކާ ނިމިފައިވާކަމަށް އެޗްޑީސީން ބުނެއެވެ. އެއީ 29 ހެކްޓަރުގެ ސަރަހައްދެކެވެ. 

ރަސްމާލެ ހިއްކުމުގެ މަސައްކަތް މި ދޭތެރެއިން ހުއްޓިފައިވަނީ، ވެލި ލިބުމުގައި ހުރި ދަތިތަކާ ގުޅިގެން ނަމަވެސް، ރަސްމާލެ މަޝްރޫޢުއާ ގުޅޭ އެހެން މަސައްކަތްތައް ހުއްޓިފައި ނުވާކަމަށް އިމާރާތްކުރުމާ ބެހޭ ވަޒީރު މުއްތަލިބް ވަނީ މީގެކުރިން ވިދާޅުވެފައެވެ.

ފުށިދިއްގަރުފަޅު ހިއްކައިގެން ރަސްމާލެ ތަރައްގީ ކުރުމުގެ މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.

މީގެ އިތުރުން، ރައީސުލްޖުމްހޫރިއްޔާ ވަނީ، ރަސްމާލެ އާއި މާލެ ސިޓީއާއި ގުޅުވާލުމަށް އަންޑަވޯޓާ ޓަނެލް އެއް އެޅުމާއި ގުޅޭގޮތުން ވެސް މަޝްވަރާތައް ކުރިއަށްދާކަން އިއުލާން ކުރައްވާފައެވެ. 

މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.