މީހުން ދިރިއުޅޭ 55 ރަށުގައި 500 މީހުން ހަމަނުވާ ކަމަށާއި ދިވެހިރާއްޖޭގެ އާބާދީއާއި ތަރައްގީ އެއްފަސްކޮށްގެން މެނުވީ ހުރިހާ ދިވެހީންނަށް ބޭނުންވާ ފެންވަރު ރަނގަޅު ޚިދުމަތެއް ނުދެވޭނެ ކަމަށް ހައުސިން މިނިސްޓަރު ޑރ. އަލީ ހައިދަރު ރޭ ވިދާޅުވެއްޖެއެވެ.

ދައުލަތުގެ މީޑިއާގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ހައިދަރު ވިދާޅުވީ، މާލެ ފިޔަވައި ރާއްޖޭގެ މީހުން ދިރިއުޅޭ 186 ރަށް އޮތްއިރު، އޭގެ ތެރެއިން 55 ރަށަކީ އާބާދީގައި 500 މީހުން ވެސް ހަމަނުވާ ރަށްތައް ކަމަށެވެ.

އާބާދީ މަދު ރަށްތަކުގައި އަސާސީ ޚިދުމަތްތައް ވެސް އެންމެ އެކަށީގެންވާ ގޮތެއް ފޯރުކޮށްނުދެވޭ ކަމަށާ، އެފަދަ ރަށްތަކުގައު ތިމާވެށިގެވެސް ގިނަ މައްސަލަ ތަކެއް ކުރިމަތިވާކަން ވަޒީރު ފާހަގަކުރެއްވިއެވެ. އެގޮތުން، ރަށް ގިރުމާއި، ވިއްސާރަވެ ފެންބޮޑުވުންފަދަ ކަންކަން ދިމާވާއިރު އެއީ ރައްޔިތުންނަށް ގިނަ ތަކުލީފް ތަކެއް ކުރިމަތިވާ ކަންކަންކަމަށް ވިދާޅުވިއެވެ. 

Advertisement

އެހެން ކަމުން، އާބާދީ މަދު ރަށްތައް ތަރައްގީކުރުމުގެ ބަދަލުގައި ވަކި ރަށްތަކަކަށް އަމާޒުކޮށްގެން ތަރައްގީ ގެނެވިއްޖެނަމަ، ޚިދުމަތް ހޯދުމަށް މާލެއަށް ބަރޯސާވާން ޖެހިފައި އޮތްއޮތުމަށް ހައްލު އަންނާނެ ކަމަށް ހައިދަރު ވިދާޅުވިއެވެ. އަދި ކުދި ރަށްތަކުގެ ރައްޔިތުން ބޮޑެތި ރަށްތަކަށް ހިޖުރަ ކުރުމުން، އެ ހިޖުރަކުރާ ފަރާތާއި ހިޖުރަ ކުރެވޭ ރަށަށްވެސް ގިނަ ފައިދާ ތަކެއް ވެގެންދާނެ ކަމަށް މިނިސްޓަރ ވިދާޅުވުއެވެ.

މިނިސްޓަރު ވިދާޅުވި ގޮތުގައި އާބަން ސެންޓަރުތަކެއް ތަރައްގީކުރުމުގެ އެންމެ ބޮޑު މަގުސަދަކީ އެއީއެވެ.

"އޭގެ ފައިދާ މުޅި މުޖުތަމައަށް ވާނެ. މާލެއަށް ކޮންމެ ފަހަރަކު ޚިދުމަތެއް ހޯދަން އަންނަން ނުޖެހޭނެ ރައްޔިތުންނަކަށް. އެހެންވީމާ ރައްޔިތުންނާ ގާތުން އެ ހުރިހާ ޚިދުމަތްތަކެއް ލިބޭނެ ގޮތެއް ހަމަޖެހިގެންދާނެ. އެހެންވީމާ އެއީ އެންމެ ބޮޑު ބޭނުމަކީ، މަގުސަދަކީ އާބަން ސެންޓަރުތަކެއް ގާއިމުކޮށް، އެ ރަށްތަކަށް ފޯކަސްކޮށް އިންވެސްޓްމަންޓްތަކެއް ގެނައުން،" މިނިސްޓަރު ވިދާޅުވިއެވެ.

ހައިދަރު އިތުރަށް ވިދާޅުވި ގޮތުގައި އާބަން ސެންޓަރުގެ ގޮތުގައި ތަރައްގީކުރާނެ ރަށްތައް ކަނޑައެޅުމުގައި ބަލާފައިވާނީ އެ ރަށަކަށް ކޮށްފައިވާ އިންވެސްޓްމަންޓުތަކަށެވެ. އެ ގޮތުން ސިއްހީ، ތައުލީމީ އަދި އުމްރާނީ އެހެނިހެން ޚިދުމަތްތައް ދެވިފައިހުރި މިންވަރާއި، ރަށް އިތުރަށް ބޮޑުކުރެވޭނެތޯވެސް އެ ރަށްތައް ކަނޑައެޅުމުގައި ބަލާފައިވާނެ ކަމަށް ވިދާޅުވިއެވެ.

މިނިސްޓަރު އިތުރަށް ވިދާޅުވި ގޮތުގައި އާބަން ސެންޓަރުތައް ތަރައްގީ ކުރާނީ 100،000 މީހުންނަށް ދިރިއުޅެވޭ ގޮތަށެވެ.

"ފަސް އަހަރު ދުވަހުގެ ތެރޭ އެ މަސައްކަތް ފަށައިގަނެގެން އަދި ދުވަސްކޮޅެއް ނަގާނެ އަޅުގަނޑު ހިތުން 100،000އާ ހިސާބަށް ފޯރަން. އެއީ މިހާރު ދެކުނުގެ ރީޖަންގައި އުޅެނީ 50،000 މީހުން. އުތުރުގައި ވެސް ހަމަ 55،000 ވަރު ގާތްގަނޑަކަށް މި އުޅެނީ އިނގޭތޯ. އެހެންވީމާ 100،000 ގެނެސްގެން ނޫނިއްޔާ ތަންކޮޅެއް މަތީ ފެންވަރުގެ ޚިދުމަތްތައް ދޭން އުނދަގޫވާނެ،" މިނިސްޓަރު ވިދާޅުވިއެވެ.