ނިމިގެންދިޔަ 15 ވަނަ ވަރލްޑް ބޮޑީބިލްޑިން އެންޑް ފިސީކް ސްޕޯޓްސް ޗެމްޕިއަންޝިޕާ ގުޅިގެން ރައްޔިތުންގެ ފަރާތުން ކަންބޮޑުވުންތަކެއް ހުރުމުން އެކަމަށް މައާފަށް އެދޭކަމަށް ބޮޑީ ބިލްޑިން އެސޯސިއޭޝަން އޮފް މޯލްޑިވްސްއިން ބުނެފިއެވެ.
ބީބީއޭއެމުން ނެރެފައިވާ ބަޔާނެއްގައި ބުނެފައިވަނީ، މުބާރާތް ކުރިއަށް ގެންދިއުމަށްޓަކައި ރައީސުލްޖުމްހޫރިއްޔާ އާއި ސްޕޯޓްސް މިނިސްޓްރީން އިރުޝާދު ދެއްވާފައިވާ ގޮތަށް ކުރިއަށްގެންދިއުމަށް އެ އެސޯސިއޭޝަނުން މަސައްކަތްކޮށްފައިވާކަމަށެވެ.
ނަމަވެސް މުބާރާތާ ގުޅިގެން އާންމު ރައްޔިތުންގެ ކަންބޮޑުވުންތަކެއް ހުރުމުން، ރައީސުލްޖުމްހޫރިއްޔާ އާއި ދިވެހި ރައްޔިތުންގެ ފަރާތުން ނިހާޔަތަށް މައާފަށް އެދޭކަމަށާއި މުސްތަގްބަލުގައި ދެން މިފަދަކަމެއް ތަކުރާރު ނުވާނޭކަމުގެ ފުރިހަމަ ޔަގީންކަން ރައްޔިތުންނަށް އަރުވާކަމަށްވެސް ބީބީއޭއެމްގެ ބަޔާނުގައި ބުންޏެވެ.
ބީބީއޭއެމުން ބުނީ، އެ ޖަމިއްޔާއިން އެފަދަ ބައިނަލްއަޤްވާމީ މުބާރާތެއް ބޭއްވުމަށް މަސައްކަތްކުރީ ރާއްޖޭގެ ޕްރޮފައިލް ބައިނަލްއަޤްވާމީ ކުޅިވަރު ދުނިޔޭގައި ވަރުގަދަ ކުރުމަށާއި މިކަމުގެ ސަބަބުން ރާއްޖޭގެ އިގްތިސާދަށާއި ޓޫރިޒަމަށް ލިބޭނޭ ކުރިއެރުމަށް ވިސްނަިއގެން ކަމަށެވެ.
މުބާރާތް ބޭއްވީ ދުރާލާ އެކަމަށް ތައްޔާރުވެ، އެހެންގައުމުތަކާ ވާދަކޮށް ކަމަށާއި، މުބާރާތް ބޭއްވުމަށް އެއްބަސްވުމުގައި ސޮއިކުރުމަށްފަހު މުބާރާތް ކެންސަލްކޮށްފިނަމަ ރާއްޖޭގެ ކުޅިވަރުގެ ދާއިރާއަށް ލިބިދާނެ ގެއްލުމަކަށް ބަލާފައި މުބާރާތާއިގެން ކުރިއަށްދިޔައީކަމަށްވެސް ބީބީއޭއެމްގެ ބަޔާނުގައި ބުންޏެވެ.
ނިމިގެންދިޔަ 15 ވަނަ ވަރލްޑް ބޮޑީބިލްޑިން އެންޑް ފިސީކް ސްޕޯޓްސް ޗެމްޕިއަންޝިޕާ ގުޅިގެން ކަންބޮޑުވުންތައް އައިސްފައިވަނީ، ކީރިތި ގުރުއާނުގެ ބަރަކާތުން ފެށި އިވެންޓެއްގައި އައުރަ ނިވާނުވާވަރަށް މުބާރާތުގެ ބައިވެރިން ތިބުމުންނެވެ.
Advertisement
This content is created and paid for by advertisers and does not involve Voice Journalists
