ގެއްލުނު ކަނޑުގެ ބައި ހޯދުމުގައި ފަހަތަށްޖެހި ވަޑައިނުގަންނަވާނޭ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. 

ޖުމްހޫރީދުވަހުގެ މުނާސަބަތުގައި މިރޭ ޤައުމާ މުހާތަބުކުރައްވައި ވާހަކަދައްކަވަމުން ރައީސް ވަނީ ޗާގޯސްގެ މައްސަލާގައި މިހާރު ސަރުކާރުން ކުރިއަށްގެންދާ މަސައްކަތުގެ އެންމެ ފަހުގެ ވާހަކަތައް ހިއްސާކުރައްވާފައެވެ. ރައީސް ވިދާޅުވީ ގެއްލުނު ކަނޑުގެ ބައި ހޯދުމުގެ މަސައްކަތް މި ސަރުކާރުން ހުއްޓާނުލާނެ ކަމަށާއި އެ މަސައްކަތްތައް ދާނީ ކުރިއަށްކަމަށެވެ. 

ރައީސް ޑރ.މުއިއްޒު ވިދާޅުވީ ގެއްލުނު ކަނޑުގެ ބައި ހޯދުމުގެ މަަސައްކަތް ކުރުމަށް އެކަމަށް ހާއްސަކޮށް މުއައްޒަފުން ލައިގެން މަސައްކަތްކުރަމުންދާކަމަށާއި، ކުރިއަށްވުރެ ބާރަށް އެ މަސައްކަތް ކުރިއަށްދާކަމަށެވެ.

ޗާގޯސް މައްސަލާގައި މިފަހުން އިނގިރޭސިން ވަނީ ޗާގޯސްގެ ސިޔާދަތީ ބާރުތައް މޮރިޝަސްއަށް ދިނުމަށް ނިންމާފައެވެ. މިކަމާ ގުޅިގެން އެޓާނީ ޖެނެރަލް އަހުމަދު އުޝާމް ވިދާޅުވެފައިވަނީ އިނގިރޭސިވިލާތުގެ އެ ނިންމުމުގެ ސަބަބުން މި މައްސަލަ އެއްކޮށް މުރާޖައާކުރަން ޖެހިފައިވާކަމަށެވެ.

މިކަމާ ގުޅޭގޮތުން މިރޭ ވާހަކަދައްކަވަމުން ރައީސް ވަނީ ޗާގޯސްގެ ސިޔާދަތީ ބާރުތައް މޮރިޝަސްއަށް ދިނުމަށް އިނގިރޭސިން ނިންމުމާ ގުޅިގެން، އިނގިރޭސި ސަރުކާރަށް ސިޓީއެއް ފޮނުއްވާފައިވާކަން ހާމަކޮށްފައެވެ. މި ސިޓީގައި ޗާގޯސްގެ ހަގީގީ މިލްކުވެރިންނަކީ ސީދާ ދިވެހިންކަން ކިތާބީ ބައެއް ހެތްކާއެކު އެ ސިޓީއާއެކު ހުށަހަޅުއްވާފައިވާކަން ރައީސް ވިދާޅުވިއެވެ.

ރައީސް ވިދާޅުވީ ކަނޑުން ގެއްލުނު ބައި ހޯދުމުގެ ކަންކަން ކުރިއަށްއޮތް ތަނުގައި ދާނީ މީގެ ކުރިން މި މަސައްކަތް ކުރިވަރަށްވުރެވެސް ބާރަށްކަަމަށެވެ.

ޗާގޯސްގެ ސިޔާދަތީ ބާރުތައް މޮރިޝަސް އާ ހަވާލުކުރުމަށް ނިންމުމާއި ގުޅިގެން އިނގިރޭސި ހާރިޖީވަޒީރު ޑޭވިޑް ލެމީ ދެއްވި ސްޓޭޓްމެންޓެއްގައި ވިދާޅުވެފައިވަނީ، މި ނިންމުން ނިންމި ނަމަވެސް ޑިއޭގޯ ގާސިއާގައި އެމެރިކާ އަދި އިނގިރޭސިން ހިންގަމުން އަންނަ އަސްކަރީ މަރުކަޒުތައް އަދިވެސް ހިންގަމުންދާނީ އެ ދެ ޤައުމުންކަމަށެވެ. އޭނާ ވިދާޅުވެފައިވަނީ، މިއީ އެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަށް އެޅިގެންދިޔަ މުހިއްމު ފިޔަވަޅެއް ކަމަށެވެ. 

މި އެއްބަސްވުމުގެ ސަބަބުން އެ ސަރަހައްދުގެ ރަށްތައް ދޫކޮށް އެހެން ތަންތަނަށް ހިޖުރަކުރި މީހުންނަށް އެ ރައްތަކަށް އައުމުގެ މަގުފަހިވެގެންދާނޭކަމަށްވެސް އޭނާ ފާހަގަކުރެއްވިއެވެ. އަދި މޮރިޝަސްގެ ރަށްވެހީންނަށްވެސް ޗާގޯސްގެ ރަށްތަކުގައި ވަޒަންވެރިވުމުގެ ފުރުސަތު ލިބޭނެއެވެ.

އިނގިރޭސިން އަންނަނީ 1814 ވަނަ އަހަރުން ފެށިގެން ފޯޅަވަހި ސަރަހައްދު ކޮންޓްރޯލްކުރަމުންނެވެ. އެއަށްފަހު އިނގިރޭސިން ވަނީ މޮރިޝަސްގެ ކިބައިން 1965 އަހަރު ޗާގޯސްގެ ރަށްތަށް ނިގުޅައިގަނެފައެވެ. މިކަމުގެ ތެރެއިން ޗާގޯސްގެ ރަށްތަކުގައި ދިރިއުޅެމުން އައި 2000 ހަށްވުރެ ގިނަ ރައްޔިތުން ވަނީ މޮރިޝަސް އާއި އެނޫންވެސް ބައެއް ތަންތަނަށް ފޮނުވާލާފައެވެ.

އިންޓަރނޭޝަނަލް ކޯޓް އޮފް ޖަސްޓިސް، ނުވަތަ ބައިނަލްއަޤްވާމީ ކޯޓުން ވަނީ 2019 ވަނަ އަހަރު ޗާގޯސްގެ ރަށްތައް އިނގިރޭސިން ދޫކޮށްލަންޖެހޭކަމަށް ނިންމާފައެވެ. އެގޮތުން ޗާގޯސްގެ ރަށްތަކުން އެރަށްތަކުގައި އޭރުތިބި މީހުން ފޭބުމަށް އިނގިރޭސިން އެންގި އެންގުމަކީވެސް ގޯސް ނިންމުމެއްކަމަށް ބައިނަލްއަޤްވާމީ ކޯޓުން ވަނީ ބުނެފައެވެ.