އިންޑިޔާ ސަރުކާރުގެ އެހީގައި އެޅުނު، އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗް، ހަދާފައި އެތަނުގެ ޑޮކްޓަރުންނަށްވެސް އައީ ބޭރުގެ ސިފައިން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ރަސްމީ އިޙުތިފާލުގައި، ޤައުމާ މުޚާޠަބު ކުރައްވައި ވާހަކަފުޅުދައްކަވަމުން ރައީސް މުޢިއްޒުވަނީ މި އަހަރުގެ މެއި މަހުގެ 10 ވަނަ ދުވަހު، މަޝްވަރާގެ ރިވެތި އުސޫލުގެ ތެރެއިން ރާއްޖޭގައި ތިބި ބޭރުގެ ހުރިހާ ސިފައިން ބޭރުކޮށްފައިވާކަން ފާހަގަކުރައްވާފައެވެ. އަދި މިހާރު މިގައުމުގައި އެއްވެސް ގައުމެއްގެ ބޭރުގެ ސިފައިން ގާއިމްވެ ނުތިބޭނެ ކަމަށް އެމަނިކުފާނު ވިދާޅުވިއެވެ. 

މިއާއެކު ރައީސް މުޢިއްޒު ވިދާޅުވީ، ބައެއް ފަރާތްތަކުން އެކި ސިޔާސީ މަގުސަދުގައި ރާއްޖޭގައި މިހާރުވެސް އިންޑިޔާ ސިފައިން ތިބި ވާހަކަ ދައްކަމުންދާ ކަމަށެވެ. 

ރައީސް މުޢިއްޒު ވިދާޅުވި ގޮތުގައި، ”އިންޑިޔާ އައުޓް“ ކެންޕެއިންގައި މުޒާހަރާ ކުރީ ސެނަހިޔާއާއި އެނޫން ތަންތަނުގައި އިންޑިޔާ ޑޮކްޓަރުން ތިބެގެނެއް ނޫނެވެ. އަދި ރާއްޖޭގައި ތިބި ބޭރުގެ ސިފައިން ގެންގޮސް ނިމިއްޖެ ކަމަށާ، މިހާރު އެއްވެސް ގައުމެއްގެ ސިފައިން މި ގައުމުގައި ނެތް ކަމަށެވެ.