ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކުރުމަށާއި، ރިޔާސީ ދައުރު ފެށޭ ތާރީހަކީ ނޮވެމްބަރު 11 ކަމަށް ބަދަލުކޮށް، އެއްބުރުން ރައީސަކު ހޮވޭގޮތަށް ގާނޫނަށް އިސްލާހް ގެނައުމަށް ރައްޔިތުންގެ ފެންނަ ނުފެންނަ ވޯޓަކަށް ދާނެކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވައިފި އެވެ.
ޖުމްހޫރީ ދުވަހުގެ މުނާސަބަތުގައި ކުރިޔަށް ގެންދިޔަ ރަސްމީ ޖަލްސާގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، ރައްޔިތުންގެ މަޖިލީހުގެ މި ދައުރަށް 40 ބިލެއް ސަރުކާރެ ފަރާތުން ހުށަހެޅިފައިވާ ކަމަށެވެ. އަދި ކުރިއަށް އޮތް ތަނުގައިވެސް މުހިންމު ބިލުތަކެއް ހުށަހެޅުމަށް ނިންމަވާފައިވާ ކަމަށެވެ.
އޭގެ ތަފްސީލަށް ވަޑައިގަންނަވަމުން ރައީސް ވިދާޅުވީ، އެމަނިކުފާނުގެ ވަޢުދުފުޅާއި އެއްގޮތަށް، ރައީސުލްޖުމްހޫރިއްޔާ ކަމުގެ ހުވާ ކުރައްވާ ދުވަސް ނޮވެމްބަރު 11 އަށް ބަދަލު ކުރުމަށް ގާނޫނު އިސްލާޙް ކުރުމެވެ. ރައީސް ވިދާޅުވި ގޮތުގައި، ވެރިކަމުގެ ހުވާ ތާރީހަކީ ނޮވެމްބަރު 17 ކަމަށް ބަދަލު ކުރެވުނީ ސިޔާސީ އޮއިވަރެއްގެ ސަބަބުންނެވެ.
ރޭގެ ޖަލްސާގައި ރައީސް މުޢިއްޒު ވާހަކަދައްކަވަނީ: ފޮޓޯ/ ރައީސް އޮފީސް<br>
މިއާއެކު ރައީސް މުޢިއްޒު ވިދާޅުވީ، ގާނޫނު އޮތް ގޮތުން، އެ ނިންމުމަކީ ސީދާ އެމަނިކުފާނު ނުވަތަ ރައްޔިތުންގެ މަޖިލީހުން ވެސް ކަނޑައެޅޭ ވަރަށް ވުރެ ބޮޑު ނިންމުމަކަށް ވާތީ އެކަން ކުރުމަށް ދާން ޖެހެނީ ރައްޔިތުންގެ ގާތަށް ކަމަށެވެ.
ރައްޔިތުންގެ ގާތަށް ދާން މި ޖެހެނީ. ރައްޔިތުން ގާތު އަހާލަން އެބަޖެހޭ ފެންނަ ނުފެންނަ ވޯޓަކަށް ޖުމްހޫރީ ދުވަސް. މާނައަކީ މި ދައުރު ނިމޭ ދުވަސް 2028 ގެ ނޮވެމްބަރު 11 އަށް ބަދަލު ކުރަން. ހަފުތާއެއް ކުރުވުން. ރައްޔިތުން އެގޮތަށް ރުހެންތޯ އަޅުގަނޑު އަހާލާނަން ރައްޔިތުންގެ ގާތު. ރައްޔިތުން ރުހޭ ނަމަ، (ހުވާކުރާ ދުވަސް) ނޮވެމްބަރު 11 އަށް ބަދަލުވެގެންދާނެ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
މިއާއެކު އެމަނިކުފާނުގެ ވަޢުދުފުޅާއި އެއްގޮތަށް ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށް ބޭއްވުމަށް ރައްޔިތުންގެ ފެންނަ ނުފެންނަ ވޯޓެއް ނެންގެވުމަށް ނިންމަވާފައިވާ ކަމަށް ވިދާޅުވުއެވެ.
ދެ އިންތިޚާބާއި ދޭތެރޭގައި (ރިޔާސީ އިންތިޚާބާއި މަޖިލިސް އިންތިޚާބާ ދޭތެރޭގައި) މި އޮންނަނީ ދެތިން މަސް ނޫންތޯ؟ އެތައް ޚަރަދެއް އެބަ ހިނގާ. އީސީއިން އެކަނިވެސް އެތައް ޚަރަދެއް ކުރޭ. އޭގެ ބަދަލުގައި ރިޔާސީ އިންތިޚާބާއި އެކުގައި މަޖިލިސް އިންތިޚާބު ބޭއްވުމަކީ އަޅުގަނޑު ދެކޭގޮތް. އެހެން ނަމަވެސް އަޅުގަނޑަކަށް އެކަނި ނުނިންމޭނެ. ރައްޔިތުން ގާތުގައި އަޅުގަނޑުމެން އަހަން ގަސްތުކުރަން. ރައްޔިތުން ބޭނުންވަންޏާ ދެން އަންނަ ރިޔާސީ އިންތިޚާބަކާއި އެކީގައި، އޮންނާނެ ރައްޔިތުންގެ މަޖިލިސް އިންތިޚާބު. އެކަމަށްވެސް އަޅުގަނޑު ރައްޔިތުން ގާތުގައި އަހާނަން. މަޖިލިސް މެދުވެރިކޮށް.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރޭގެ ޖަލްސާގައި ރައީސް މުޢިއްޒު ވާހަކަދައްކަވަނީ: ފޮޓޯ/ ރައީސް އޮފީސް
މީގެއިތުރުން، ބައެެއް ގައުމުތަކުގައި އޮންނަ ގޮތަށް، ރިޔާސީ އިންތިހާބުގެ ދެވަނަ ބުރުގެ ބަދަލުގައި އެއްބުރުން، އިންތިޚާބު ކާމިޔާބު ކުރާ ކެންޑިޑޭޓު ކަނޑައެޅުމުގައި އަމަލު ކުރެވިދާނެ ގޮތެއް ހޯދުމަށް އެޓާނީ ޖެނެރަލް އާއި ގުޅިގެން މަޝްވަރާކުރެވި، ދިރާސާ ކުރައްވަމުންދާ ކަމަށް ރައީސް ވިދާޅުވިއެވެ.
ދެވަނަ ބުރު އުވާލަން އެބަޖެހޭ. އަޅުގަނޑު ގަބޫލުކުރާ ގޮތުގައި. ދެވަނަ ބުރަކަށް ނުގޮސް، ފުރަތަމަ ބުރުގައި، ޕްރިފަރެންޝަލް ވޯޓިންގ އިން، ދެވަނަ ބުރަކަށް ދާ ހާލެއްގައި ޗޫސް ކުރާނެ ވެރިމީހާވެސް އެނގޭ ގޮތަށް ވޯޓް ލެވޭ ގޮތަށް. މާނައަކީ އެއްބުރުން ނިމޭނެއޭ. އެއްބުރުން އެއްވަނަ ދެވަނަ ސާފުވާ ގޮތަށް. އަޅުގަނޑުހިތުން އަވަށްޓެރި ބައެއް ގައުމުތަކުގައިވެސް އޮތީ އެހެން. އެކަމުގެ ދިރާސާ ކޮށްފައި، އެއީ ރައްޔިތުންނަށް އެންމެ ރަނގަޅު ގޮތް ކަމަށް ވަންޏާ މަޖިލިސް މެދުވެރިކޮށް، ރައްޔިތުން އެކަމަށް އެދޭ ނަމަ، އަންނަ ރިޔާސީ އިންތިޚާބުން ފެށިގެން ދެބުރު ނޯންނަ ގޮތަށް އެއްބުރުން މީހަކު ހޮވާ ގޮތަށް ކަންކަން ބަދަލު ކުރަން. އެކަމަށްވެސް ފެންނަ ނުފެންނަ ވޯޓަކަށް އަހަން ގަސްތުކުރަން
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް މުޢިއްޒު ވިދާަޅުވި ގޮތުގައި އެގޮތަށް ކަން ކުރުމަކީ ޚަރަދުތައްވެސް ކުޑަވާނެ ގޮތެވެ.
މީގެ އިތުރުންވެސް، މަދު އާބާދީތައް ހިމެނޭ ރަށްރަށުގެ ކައުންސިލަރުންގެ އަދަދު މަދުކުރުމަށްވެސް ގާނޫނަށް އިސްލާހް ގެންނަވަން ނިންމަވާފައިވާކަން ރައީސް ވަނީ އިއުލާން ކުރައްވާފައެވެ.
Advertisement
This content is created and paid for by advertisers and does not involve Voice Journalists
