ހުދުމުހުތާރު ވެރިކަމަކަށް ރާއްޖެ ދިޔަ ނުދިނުމަކީ އެންމެންގެވެސް ޤައުމީ ވާޖިބެއްކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވީ، ޖުމްހޫރީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.

މިގޮތުން ޖުމްހޫރީ ދުވަހުގެ ތަހުނިޔާ ދިވެހި ރައްޔިތުންނަށް އަރިސްކުރައްވަމުން ޝާހިދު ވިދާޅުވީ، ރިޔާސީ ނިޒާމު ނުވަތަ ސީދާ ރައްޔިތުން އިންތިޚާބުކުރާ ވެރިޔަކު ވެރިކަން ހިންގާ ނިޒާމެއް ދިވެހި ރައްޔިތުން ބަލައިގަތީ މަތިވެރި އުއްމީދެއްގައި ކަމަށާއި، މާޒީގައި ދިވެހީން ކުރި ތަޖުރިބާގެ އަލީގައި، ޚުދްމުޚްތާރު ވެރިކަމުގެ ނިޒާމަށް ނޫނެކޭ ބުނުމަށް ކަމަށެވެ.

މިއާއިއެކު، "ދިވެހިދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މިބާރުތައް ދެމިއޮންނާނީ ރައްޔިތުންގެ ކިބައިގައެވެ،" މިފަދައިން މިއަދު ޢަމަލުކުރަމުން މިދާ ޤާނޫނުއަސާސީގެ ފުރަތަމަ ބާބުގެ 4 ވަނަ މާއްދާގައި ބަޔާންވެފައިވާކަން ފާހަގަކޮށް ޝާހިދު ވިދާޅުވީ، މިއީ  ދިވެހި ރައްޔިތުން ޚުދުމުޚްތާރު ވެރިކަމަކަށް ޖާގަ ނުދޭނެ ކަން ސާފު ސާދާ ޢިބާރާތުން ބުނެފައިވާކަމަށެވެ.

އެހެންނަމަވެސް ހިތާމަޔަކީ ޤާނޫނު އަސާސީގެ ރޫޙާއި, ބަޔާން ކޮށްފައިވާ އެންމެހާ ހަމަތަކާއި އަސާސްތަކާއި ޚިލާފަށް, ވެރިކަމުގެ ބާރުތައް ޖަމާކޮށް ޚުދުމުޚްތާރު ވެރިކަމެއްގެ ސިފަ މިއަދު އަށަގަންނަމުންދާތަން ފެންނަމުންދާކަންކަމަށް ޝާހިދު ވިދާޅުވިއެވެ.

މި މަގަށް ރާއްޖެ ދިޔަ ނުދިނުމަކީ އެންމެންގެވެސް ޤައުމީ ވާޖިބެއްކަމަށް ޝާހިދު ވިދާޅުވިއެވެ.