ރާއްޖެއަށް އެހީތެރިކަން ބޭނުންވާ ދާއިރާތަކާއި، އަދި އެދާއިރާތަކުން އިތުރަށް ގުޅުންބަދަހިކުރުމާ ގުޅޭގޮތުން، ސައުދީ ފަންޑް ފޯ ޑިވެލޮޕްމަންޓާއެކު މަޝްވަރާކޮށްފިއެެވެ.
ރައީސް އޮފީހުން ބުނީ ރާއްޖެއަށް އެހީތެރިކަން ބޭނުންވާ ދާއިރާތަކާ ގުޅޭގޮތުން ސައުދީ ފަންޑް ފޯ ޑިވެލޮޕްމަންޓްގެ ޗީފް އެގްޒެކެޓިވް އޮފިސަރު، ސުލްތާން ބިން އަބްދުއްރަޙްމާން އަލް މަރްޝަދާއެކު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަޝްވަރާކުރައްވާފައެވެ.
ދެ ބޭފުޅުންގެ މަޝްވަރާތައް ބާއްވާފައިވަނީ، ސައުދީ އަރަބިއްޔާގެ ރިޔާޛުގައި ފެށި ޖޮއިންޓް ޢަރަބް-އިސްލާމިކް ސަމިޓުގެ ހަވާސާގެ ތެރެއިން ބޭއްވިގެންދިއަ ބައްދަލުވުމުގައެވެ. މި ބައްދަލުވުމުގައި ރައީސް ޑރ.މުއިއްޒު ވަނީ މިވަގުތައް ރާއްޖެއަށް އެންމެބޮޑަށް އެހީތެރިކަން ބޭނުންވާ ދާއިރާތަކާ ގުޅޭގޮތުން ވާހަކަދައްކަވާފައެވެ. އަދި ސައުދީގެ ފަރާތުން އެހީލިބިގެން ކުރިއަށްގެންދާ މަޝްރޫޢުތަކުގެ މައުލޫމާތުވެސް ވަނީ ހިއްސާކުރައްވާފައެވެ.
މި ބައްދަލުވުމުގައި ސުލްތާން ބިން އަބްދުއްރަޙްމާން އަލް މަރްޝަދާ ވަނީ، ސައުދީ ފަންޑުގެ އެހީ ރާއްޖެއަށް ދިނުމުގައި ދެނިއޮންނާނޭ ކަމުގެ ޔަގީންކަން ދެއްވާފައެވެ.
ވެލާނާ އިންޓަރނޭޝަނަލް އެއާޕޯޓް ތަރައްޤީކުރުމުގެ މަޝްރޫޢު އާއި ސިއްހީ ދާއިރާގެ ވަސީލަތްތައް ތަރައްޤީކުރުމަށް ސައުދީ ފަންޑުން ވަނީ މިއަހަރުގެ ކުރީކޮޅު 150 މިލިއަން ޑޮލަރުގެ ލޯން އެހީއެއް ދީފައެވެ. އޭގެ ތެރެއިން 100 މިލިއަން ޑޮލަރުގެ ލޯން އެހީ ހާއްސަކޮށްފައިވަނީ ވެލާނާ އިންޓަރނޭޝަނަލް އެއާޕޯތްގެ ތަރައްޤީއަށެވެ. އަދި އަނެއް 50 މިލިއަން ޑޮލަރުގެ ލޯނު އެހީ އެކަށައެޅީ ސިއްހީ ދާއިރާގެ ތަރައްޤީއަށެވެ.
Advertisement
This content is created and paid for by advertisers and does not involve Voice Journalists
