ސަރުކާރުން ހުށަހަޅާފައިވާ މާލީ އިސްލާހުތަކުގެ ތެރެއިން އާސަންދައިގެ ނިޒާމަށް ގެންނަ އިސްލާހުތަކުގެ ތެރެއިން ވަކިވަރަކަށްވުރެ ބޮޑު އާމްދަނީއެއް ލިބޭ މީހުން އާސަންދައަށް އަގެއް ދައްކަން ޖެހޭގޮތް ހަދަން ހުށަހެޅުމަށް ސަރުކާރުން ނިންމައިފިއެވެ.

ސަރުކާރުގެ ގެެޒެޓުގައި ޝާއިއުކޮށްފައިވާ ބަޖެޓް މައުލޫމާތު ފޮތުގައި ބުނީ، މި އަހަރުގެ ނިޔަލަށް އާސަންދައިގެ ހަރަދު 2.2 ބިލިއަން ރުފިޔާއަށް އަރާނެ ކަމުގައި ލަފާކުރެވޭ ކަމަށާއި، ސިއްހީ ވެލްފެއާގެ ނިޒާމަަށް މުޅިޖުމްލަ 3.9 ބިލިއަން ރުފިޔާ ހަރަދުވާނެ ކަމަށެވެ.

މިގޮތަށް ހަރަދު އިތުރުވުމަކީ ދެމެހެއްޓެނެވި ގޮތެއްގައި މި ނިޒާމުތައް ކުރިއަށްގެންދަން އޮތް ގޮންޖެހުމެއް ކަމަށް ބަޖެޓް ފޮތުގައި ފާހަގަކޮށްފައިވާއިރު، ސަރުކާރުން ބުނީ އާސަންދައިގެ ދަށުން ސިއްޚީ ޚިދުމަތް ފޯރުކޮށްދިނުމަށް ކުރާ ޚަރަދު ފާއިތުވި ފަސް އަހަރުގެ ތެރޭގައި އަހަރަކު އެވަރެޖްކޮށް 9.2 އިންސައްތައިން އިތުރުވެފައިވާ ކަމަށެވެ.

Advertisement

އެހެންކަމުން، އާސަންދައިގެ ނިޒާމުގެ އެފިޝިއަންސީ އިތުރުކޮށް އެ ނިޒާމުގެ ދެމެހެއްޓެނެވިކަން ކަށަވަރުކުރުމަށް ސަރުކާރުން ވަނީ މަހަކު 60،000 ރުފިޔާއަށް ވުރެ ބޮޑު އާމްދަނީ ލިބޭ ނުވަތަ އިންކަމް ޓެކްސް ދައްކަން ޖެހޭ މީހުން 2025 ވަނަ އަހަރުގެ އޭޕްރީލު މަހުން ފަށައިގެން އާސަންދައަށް ކޮންމެވެސް މިންވަރެއް ދައްކަން ޖެހޭ ގޮތަށް އިސްލާހު ގެނައުމަށް ހުށަހަޅާފައެވެ. 

އެއީ ދެކުނުކޮރެއާ ފަދަ ތަރައްގީވެފައިވާ ގައުމުތަކުގައި ކާމިޔާބުކަމާއެކު މިހާރުވެސް ހިންގަމުންދާ ނިޒާމެއްކަމަށާއި، މި އިސްލާހުގެ ސަބަބުން އެންމެ ފަގީރު މީހާއަށް އެއްވެސް ބުރައެއް އުފުލަންނުޖެހި ހިލޭ ބޭސްފަރުވާ ލިބުމުގެ ޖާގަ އިތުރުކުރެވޭނެކަމަށް ސަރުކާރުން ބުނެއެވެ.

މީގެ އިތުރުންވެސް،  ބޮޑު އާމްދަނީއެއް ލިބޭ މީހުން އައުޓްޕޭޝަންޓު ހިދުމަތްތައް ހޯދާއިރު އަދި އެސެންޝިއަލް ނޫން ބޭސް ގަންނައިރު ބިލުގެ ވަކި މިންވަރަކަށް ކޮންޓްރިބިއުޝަންއެއް ދައްކަން ޖެހޭ ގޮތަށް ނުވަތަ ކޯޕޭ އުސޫލަށް ނިޒާމު ބަދަލުކުރަން ސަރުކާރުން ހުށަހަޅާފައިވާއިރު، އެ އިސްލާހުވެސް ތަންފީޒުކުރާނީ އަންނަ އަހަރުގެ އޭޕްރީލު މަހުން ފެށިގެންނެވެ.

މި އުސޫލުގެ ދަށުން އާސަންދައަށް ހިއްސާކުރަންޖެހޭ މިންވަރާއި އަހަރެއްގެ ތެރެގައި ގިނަވެގެން ހަރަދުކުރަންޖެހޭ މިންވަރު އާމްދަނީއަށް ބަލައި ކަނޑައަޅާނެކަމަށާއި، އެ މިންވަރުގެ އިތުރަށް އަތުން ފައިސާ ދައްކަން ނުޖެހި މިހާރެކޭވެސް އެއްގޮތަށް ޚިދުމަތް ހޯދޭނެކަމަށް ސަރުކާރުން ބުނެއެވެ.

ބަޖެޓް ފޮތުގައިވާގޮތުން، މި އިސްލާހުން،  18 އަހަރު ނުފުރޭ ކުޑަކުދިންނާއި، 65 އަހަރުން މަތީގެ މީހުންނާއި، ދާއިމީކޮށް ފަރުވާކުރަންްޖެހޭ ބަލިތަކާއި ފުރާނައަށް ނުރައްކާވާ ބަލިތައް ތަހައްމަލުކުރާ މީހުން އިސްތިސްނާވާނެއެވެ.