އަންނަ އަހަރު ނިމޭއިރު ދައުލަތުގެ ޖުމްލަ ދަރަނި 150 ބިލިއަން ރުފިޔާއަށް އަރާނޭކަމަށް މާލީ ވުޒާރާއިން ލަފާކޮށްފިއެވެ.

ފިނޭންސް މިނިސްޓްރީން މިއަދު އާއްމުކުރި 2025 އަހަރަށް ލަފާކުރާ ދައުލަތުގެ ބަޖެޓް މައުލޫމާތުގައި ބުނެފައިވާގޮތުން މިއަހަރަށް ފާސްކުރި ބަޖެޓަށްވުރެ ލަފާކުރާ ޑެފިސިޓް ފުޅާވެގެންދިއުމާއެކު، ދައުލަތުގެ ސީދާ ދަރަނި މިއަހަރު ނިމޭއިރު 124.7 ބިލިއަން ރުފިޔާއަށް އަރާނޭކަމަށް މިހާރު ބެލެވޭ ކަމަށެވެ. މިއީ މިދިޔަ އަހަރުގެ ސީދާ ދަރަންޏާ އަޅާބަލާއިރު،  12.8 އިންސައްތައިގެ އިތުރުވުމެކެވެ.

ބަޖެޓް މައުލޫމާތު ފޮތުގައި ފިނޭނުންސުން ވަނީ މިއަހަރުގެ ތެރޭގައި ގައުމީ އުފެއްދުންތެރިކަމުގެ ނިސްބަތުން ދަރަނީގެ މިންގަނޑު އިތުރުވެ، 114.4 އިންސައްތައަށް އަރާނޭކަމަށް ލަފާކޮށްފައެވެ. ކުރިއަށް އޮތް އަހަރުތަކަށް ރާވާފައިވާ ޑެފިސިޓް ބަޖެޓްތައް ފައިނޭންސް ކުރުމަށާއި ދަރަނީގެ ބައެއް ރީފައިނޭންސް ކުރުމަށް ދައުލަތުން ފައިސާ ހޯދަންޖެހޭ މިންވަރު އިތުރުވެ ސީދާ ދަރަނި ކުރިއަށްއޮތް ތަނުގައިވެސް އިތުރުވާނޭކަމަށް ވަނީ ލަފާކޮށްފައެވެ.

ދަރަންޏަށް ބަލާއިރު، މިއަހަރު ނިމޭއިރު، ސަރުކާރުން ގެރެންޓީ ދީފައިވާ ދަރަނި 13.9 ބިލިއަން ރުފިޔާއަށް ދަށްވެގެންދާއިރު، އަންނަ އހަރު ނިމޭއިރު އެ އަދަދު 12.3 ބިލިއަން ރުފިޔާއަށް ދަށަށްދާނޭކަމަށް ސަރުކާރުން ވަނީ ލަފާކޮށްފައެވެ. 

އަންނަ އަހަރު ނިމޭއިރު ޖުމްލަ ބޭރު ދަރަނި 55 ބިލިއަން ރުފިޔާއަށް އަރާއިރު، އެތެރޭގެ ދަރަނި 80 ބިލިއަން ރުފިޔާއަށްވުރެ މައްޗަށްދާނޭކަމަށް ވަނީ ލަފާކޮށްފައެވެ.

އަންނަ އަހަރު ނިމޭއިރު ދައުލަތުގެ ސީދާ ދަރަނި 137.7 ބިލިއަން ރުފިޔާއަށް އަރައިގެންދާއިރު، މިއީ ޖީޑީޕީގެ ނިސްބަތުން 114.6 އިންސައްތައެވެ. މިދިޔަ އަހަރުތަކުގައި ފައިސާ ޗާޕްކުރުމާއި، ރިކަރަންޓް ހަރަދުތައް އިންތިހާއަށް ބޮޑުވުމުގެ ނަތީޖާއެއްގެ ގޮތުން،  2026 އަދި 2027 ވަނަ އަހަރުތަކުގައިވެސް ދައުލަތުގެ ސީދާ ދަރަނި ގައުމީ އުފެއްދުންތެރިކަމުގެ ނިސްބަތުން 95 އިންސައްތައަށްވުރެ ތިރިވާނޭކަމަށް ނުބެލެވޭކަމަށް މާލީ ވުޒާރާއިން ވަނީ ލަފާކޮށްފައެވެ.