ރާއްޖެ އޮތީ އެއްކޮށް ”ފުނޑިފައި“ ކަމަށާ، މިއީ އެންމެން އެކީގައި ތެދުވެ ނުކުންނަންވީ ވަގުތު ކަމަށް ކުރީގެ ރައީސް އިބްރާޙީމް މުޙައްމަދު ޞާލިޙް ވިދާޅުވެއްޖެއެވެ.

އެމްޑީޕީން ބޭއްވި "ފުދިއްޖެ ފުނޑިއްޖެ" ޖަލްސާގައި ވާހަކަދައްކަވަމުން ރައީސް ސޯލިހު ވިދާޅުވީ، މި ސަރުކާރަށް އެންމެ އަހަރެއް ފުރުނު އިރު ދިވެހިން ތިބި ހާލާމެދުގައި ވިސްނާލަންޖެހޭ ކަމަށެވެ. 

އެގޮތުން ރާއްޖޭގެ ތާރީޚްގައިވެސް މަސްވެރިން އެންމެ ހާލުގައި އުޅެންޖެހިފައިވާ ދުވަސް ވަރަކީ މިއީ ކަމަށް ވިދާޅުވިއެވެ. އެގޮތުން، މަހުގެ އަގު ކުޑަކޮށް، ފައިސާވެސް ނުދޭތާ، މަސްވެރިކަމުގެ ސިނާޢަތު ކޮޅަށް ޖެހުމަށް އެމްޑީޕީ ސަރުކާރުން ކުރި ހުރިހާ ކަމެއް ހުއްޓާލާފައިވާ ކަމަށް އެމަނިކުފާނު ވިދާޅުވިއެވެ. 

Advertisement

މީގެ އިތުރުން ވިޔަފާރިތަކާއި، ޓެކްސީ ޑްރައިވަރުންނަށްވެސް ބޮޑެތި ގެއްލުންވަމުންދާ ކަމަށާ އެތަން ބަލަން ތިބެވެނ ނެތް ކަމަށް ރައީސް ޞާލިހް ވިދާޅުވިއެވެ. 

މިއާއެކު ރައީސް ޞާލިޙް ވިދާޅުވީ، މާލޭގެ ރައްޔިތުންނަށް ބޯހިޔާވަހިކަން ހޯދައިދިނުމަށް އެމްޑީޕީ ސަރުކާރުން ފެށި މަސައްކަތްވެސް މި ސަރުކާރު އައިސް ހުއްޓާލާފައިވާ ކަމަށެވެ. އެގޮތުން، މާލޭގެ ރައްޔިތުންނަށް ދިން ފުލެޓްތައްވެސް އަތުލައި ބޭނުން ބަޔަކަށް ބަހާލަން ތައްޔާރުވާކަމަށް ވިދާޅުވިއެވެ. 

މިއާއެކު ރައީސް ޞާލިޙް ވިދާޅުވީ، ރައްޔިތުންގެ ހައްގުގައި އެމްޑީޕީ އަނެއްކާވެސް ނުކުންނާނެ ކަމަށެވެ. އަދި މިހާރުން މިހާރަށްވެސް ނުކުންނަން ޖެހޭ ކަމަށާ، މި ސަރުކާރަށް ”ވަގުތެއް ދީފިއްޔާ ދަމައިގަންނަވަރު ބޮޑުވާނެ“ ކަމަށެވެ. 

ރައީސް ޞާލިހް އިތުރަށް ވިދާޅުވިގޮތުގައި ރައްޔިތުން ބޭނުންވާ މިސްރާބަށް އެމްޑީޕީއިން މި ގައުމު އަނެއްކާވެސް ގެންދާނެއެވެ.