ކޮވިޑް 19 ގެ ބަލިމަޑުކަމާއި ގުޅިގެން މުޅި ދުނިޔެ ބަންދުވެފައި އޮތް ޒަމާނުގައި ވެސް އެމްޑީޕީ ސަރުކާރުން ރައްޔިތުން ކައިރި ހިތި ބޭސް ބޯން ނުބުނާކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވީ، އެމްޑީޕީން "ފުދިއްޖެ، ފުޑިއްޖެ" ނަމުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މިގޮތުން ޝާހިދު ވިދާޅުވީ، ރާއްޖެ ކޮވިޑުގެ ވަބާއިން ސަލާމަތްވިއިރު، ތަފާސްހިސާބު ބަލާލައިފިނަމަ 2020 ވަނަ އަހަރު ރާއްޖޭގެ ޖީޑީޕީގެ ތިންބައިކުޅަ އެއްބައި ގެއްލިގެން ދިޔަ ކަމަށާއި، ފަތުރުވެރިކަމުގެ 67 އިންސައްތަ އުނިވެގެން ދިޔަ ކަމަށެވެ.

ދައުލަތުގެ އާމްދަނީން 29 ބިލިއަން ގެއްލިގެން ދިޔަކަން ފާހަގަކުރައްވަމުން ޝާހިދު ވިދާޅުވީ، މިއީ ކުދި ކުދި އަދަދުތަކުގެ ވާހަކަ ނޫންކަމަށެވެ.

އެއީ މުޅި ދުނިޔެ ބަންދުވެ، ތަނަކަށް ފުރައިގެން ދިޔުމާއި، އެއްޗެއް ގެނައުން ނުވަތަ ކަމެއް ކުރެވޭނެ ގޮތެއް ނެތި މުޅި ދުނިޔެ މާޔޫސްވެފައި އޮތް ޒަމާނެއް ނަމަވެސް، އެމްޑީޕީ ސަރުކާރުން ރައްޔިތުން ގާތުގައި ހިތި ބޭސް ބޯން ޖެހިއްޖޭ ވިދާޅުވިތޯ ޝާހިދު ސުވާލު އުފެއްދެވިއެވެ.

ޝާހިދު ވިދާޅުވީ، ކޮވިޑަށް ފަހު އިގްތިޞާދު އެންމެ ބާރަށް ކުރި އެރި ޤައުމުތަކުގެ ތެރޭގައި ރާއްޖެ ހިމެނޭ ކަމަށާއ، ވެރިކަން ބަދަލުވަމުން ދިޔަ އިރު އިންފްލޭޝަން ކޮންޓްރޯލްކުރެވި ރާއްޖެ އަންނަ ފަތުރުވެރިންގެ އަދަދު އިތުރުވެ، 2026 ވަނަ އަހަރަށް 5.5 އިންސައްތައިން އިގްތިޞާދީ ކުރިއެރުން ލިބޭނެ ކަމަށް ބައިނަލްއަޤުވާމީ އިދާރާތަކުން ލަފާކުރި ކަމަށެވެ.

މިބީދައިން ވާހަކަފުޅު ދައްކަވަމުން ޝާހިދު ވަނީ މި ސަރުކާރުންތިން އިރު ކާ ބޭހެއް ފަދައިން ދޮގު ހަދަމުން ކަމަށާއި ސަރުކާރުގެ ދޯހަޅި ސިޔާސަތުގެ ސަބަބުން ވަރަށް ބޮޑަށް ރާއްޖެ އަށް އޭގެ ނޭދެވޭ އަސަރުކުރާ ކަަމަށް ވިދާޅުވެ ސަރުކާރަށް ފާޑު ވިދާޅުވެފައެވެ.