މާލެ ކައިރީ އޮންނަ ގަލުފަޅުގެ ފަޅުގައި ”ނޫވެލި“ގެ ނަމުގައި ލަގްޒަރީ ގެތަކެއް ތަރައްގީކުރަން ނިންމައިފިއެވެ. 

ރޭ ހުޅުމާލޭ ސެންޓްރަލް ޕާކުގައި ބޭއްވި ހާއްސަ ރަސްމިއްޔާތުގައި ހައުސިންގ ޑިވޮލަޕްމަންޓް ކޯޕަރޭޝަން(އެޗްޑީސީ) އިން ވަނީ އެ ކޯޕަރޭޝަނުން ކުރިއަށްގެންދިއުމަށް ކަނޑައަޅާފައިވާ ބޮޑެތި މަޝްރޫއުތައް ލޯންޗުކޮށްފައެވެ. 

އެގޮތުން އެޗްޑީސީގެ ”ކީ ޕްރޮޖެކްޓްސް" ލޯންޗުކޮށްދެއްވީ، މިނިސްޓަރ އޮފް އިކޮނޮމިކް ޑިވޮލަޕްމަންޓް އެންޑް ޓްރޭޑް، މުހައްމަދު ސައީދުއެވެ.

Advertisement

މީގެ ތެރޭގައި، ހުޅުމާލޭގައި ހިންގާ އިތުރު ބޯހިޔާވަހިކަމުގެ މަޝްރޫއުތަކާއި، ރާއްޖެއަށް މުޅިން އަލަށް ތައާރަފުކުރެވޭ މަޝްރޫއުތައް ހިމެނޭހެން ޖުމްލަ 15 މަޝްރޫއެއް ވަނީ ލޯންޗުކޮށްފަ އެވެ. އަދި އޭގެ ތެރޭގައި ހިމެނޭ ބައެއް މަޝްރޫއުތަކުގެ މޮޑެލްތައްވެސް ވަނީ ދައްކާލާފައެވެ. 

އޭގެ ތެރޭގައި ހިމެނޭ އެއް މަޝްރޫޢު އަކީ، ގަލުފަޅުގެ ފަޅުތެރޭގައި "ނޫވެލި" ގެ ނަމުގައި ލަގްޒަރީ ގެތަކެއް ތަރައްގީކުރުމުގެ މަޝްރޫއެވެ.

މާލެއާ 10 މިނެޓު ދުރުގައި އޮންނަ މިތަނުގައި ލެގޫން ވިއު ފެންނަ 31 ޔުނިޓާއި، ހޮރައިޒަން ވިއު ފެންނަ 31 ޔުނިޓު އަދި 39 ގެސްޓް ވިލާ ތަރައްގީ ކުރެވިގެންދާނެ ކަމަށް އެޗްޑީސީން ބުނެއެވެ.

އަދި އެތަނުގައި ވޯޓަރ ސްޕޯޓްސް، ޑައިވް ސެންޓަރު، ރިކްރިއޭޝަނަލް ސްޕޭސެސް، ބޯލް ގޭމްސް އަދި ކޮމާޝަލް ޕްލާޒާ ހުންނާނެ ކަމަށާ، އޭގެ އިތުރުން އިވެންޓު ސްޕޭސް ތަކާއި، ކޮންވެންޝަން ސެންޓަރާއި އެގްޒިބިޝަން ހޯލްސް އަދި ބެންކުއެޓް ހޯލްސް ހުންނާނެ ކަމަށް ބުނެފައިވެއެވެ.

މި ޕްރޮޖެކްޓުގެ ސަބަބުން ކައިރި މި ސަރަހައްދުގެ ވިޔަފާރިތައް ފުޅާކުރުމަށް މަގުފަހިވާނެކަން އެޗްޑީސީން ފާހަގަކޮށްފައިވެއެވެ.

މީގެ އިތުރުން، "ކިނާރިއާ"ޑެސްޓިނޭޝަން އައިލެންޑްގެ ނަމުގައި ޓޫރިޒަމާއި، މުނިފޫހި ފިލުވުމާއި، ކޭމްޕިންގ އަދި ހިތްހަމަޖައްސާލުމަށް ދިއުމަށް އެންމެ އެކަށީގެންވާ ގޮތަށް ކުޑަގިރި ފަޅުގައި ވެސް ރަށެއް ތަރައްގީ ކުރަން ވަނީ ނިންމާފައެވެ.

މިތަނަށް، މާލެއިން ސްޕީޑް ބޯޓުގައި 15 މިނެޓުން ދެވޭ މިތަން ތަރައްގީ ކުރާނީ އިންޓަގްރޭޓެޑް ޓޫރިޒަމް އައިލެންޑެއްގެވެސް ގޮތުގައި ކަމަށް އެޗްޑީސީން ބުނެއެވެ. އެގޮތުން، ގެސްޓް ހައުސް ސްޓޭއާއި ސްޕާތައްވެސް މިތަނުގައިހުންނާނެ ކަމަށް ބުނެފައިވެއެވެ.