ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށްގެންދިއުމަށް ކަނޑައަޅާފައިވާ 15 މަޝްރޫއެއް ރޭ އިފުތިތާހުކޮށްފިއެވެ.

ހުޅުމާލޭ ސެންޓްރަލް ޕާކުގައި ބޭއްވި ރަސްމިއްޔާތެއްގައި "ޓްރާންސްފޯމިންގް ޓުމޯރޯ: ހައުސިން ޑިވެލޮޕްމަންޓް ކޯޕަރޭޝަންސް ކީ ޕްރޮޖެކްޓްސް"، އިކޮނޮމިކް މިނިސްޓަރު މުހައްމަދު ސައީދު އިފްތިތާހްކޮށްދެއްވިއިރު، މި މަޝްރޫއުތަކުގެ ތެރޭގައި ހިމެނެނީ:

1) ރަސްމާލެ - ރާއްޖޭގެ ފުރަތަމަ އީކޯ ސިޓީ:

ރައީސް ޑރ.މުޙައްމަދު މުޢިއްޒުގެ ވެރިކަމުގައި އިފްތިތާހްކުރެވިގެންދިޔަ މި މަޝްރޫއުގެ ދަށުން 65،000 ހައުސިން ޔުނިޓާއި އެކު 325،000 މީހުންނަށް ބޯހިޔާވަހިކަން ކަށަވަރުވެގެންދާނެއެވެ.

2) ރޯ ހައުސް- މޮޑާން ކަނެކްޓެޑް ހޯމްސް (ހުޅުމާލެ):

މި މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި 32 ޔުނިޓް އެޅިގެންދާއިރު، މި ޕްރައިވެޓް ރޯ ހައުސްތައް ތަރައްގީ ކުރާނީ އެކްސްކްލޫސިވް ކްލަބް ހައުސްތަކާއި، ޕޫލް އަދި އެންމެ ފަހުގެ ޒަމާނީ ވަސީލަތްތަކާއެކުއެވެ.  

3) ސޯޝަލް ހައުސިން ޕްރޮޖެކްޓްސް (ހުޅުމާލެ):

ހުޅުމާލޭގައި ކުރިއަށް ގެންދާ އިޖްތިމާއީ ބޯހިޔާވަހިކަމުގެ އިތުރު ދެ މަޝްރޫއުގެ ދަށުން ދެ ކޮޓަރި އަދި ތިން ކޮޓަރީގެ ސޯޝަލް ހައުސިން އެޕާޓްމަންޓްސް ހިމެނޭހެން ޖުމުލަ 2100 ހައުސިން ޔުނިޓު ހުޅުމާލޭގައި ގާއިމްކުރާނެއެވެ.

4) މޮޑާން ޕްރީފެބް ހޯމްސް- އިނޮވޭޓިވް، ސަސްޓެއިނަބަލް ލިވިން (ހުޅުމާލެ):

ބިންވެރިޔާ ހައުސިން ސްކީމުން ގޯތި ލިބިފައިވާ ފަރާތްތަކަށް އަމާޒުކޮށްގެން ހިންގާ މި މަޝްރޫއުގެ ދަށުން ޑިޒައިން ކަސްޓަމައިޒް ކުރެވޭ ގޮތަށް، އަވަހަށް އަދި ކުޑަ ހަރަދަކުން އިމާރާތް ކުރެވޭނެ ގެތަކެއް ބިނާކުރެވިގެންދާނެއެވެ.

5) ފަރުކޮޅުފުށި ގޭޓެޑް ކޮމިއުނިޓީ- ޕްރައިވެޓް ލަގްޒަރިއަސް ލިވިން (ހުޅުމާލެ):

ޒަމާނީ ވަސީލަތްތަކާއެކު ތަރައްގީކުރާ މަޝްރޫއުގެ ސަބަބުން ޕްރައިވެޓް ލަގްޒަރީ ލިވިން ތަޖުރިބާ ކޮށްލަން ބޭނުންވާ ފަރާތްތަކަށް އެފުރުސަތު ފަހިވެގެންދާނެއެވެ. މިގޮތުން އެތަނުގައި 20 ބީޗް ވިލާއާއި، 60 ގާޑަން ވިލާއާއި، 26 އާބަން ވިލާ އަދި 230 ސަރވިސް އެޕާޓްމަންޓް ތަރައްގީ ކުރުމަށް ވަނީ ހަމަޖެހިފައެވެ. މީގެ އިތުރުންވެސް،  ޕްލާޒާ، އިންޑޯ ސްޕޯޓްސް ކޮމްޕްލެކްސް، ކްލަބްހައުސް، ރެސްޓޯރަންޓް އަދި ލެޕް ޕޫލް ފަދަ ހިތްގައިމު ވަސީލަތްތައް ގާއިމްކުރުމަށްވެސް ވަނީ ހަމަޖެހިފައެވެ.

6) އެސްއޯއީ އޮފީސް ބިލްޑިންގް އަދި އެސްއެމްއީ ބިލްޑިން (ހުޅުމާލެ):

މިއީ ސަރުކާރު ހިއްސާވާ ކުންފުނިތައް އެއް އިމާރާތެއްގައި ހިންގޭ ގޮތަށް އަޅާ 10 ފަންގިފިލާގެ އިމާރާތެކެވެ.

7) އެޗްޑީސީ ބިލްޑިންގް (ހުޅުމާލެ):

މިއީ އެޗްޑީސީގެ އައު ހެޑް އޮފީހެވެ.

8) އެލްޑަލީ ކެއާ ފެސިލިޓީ (ހުޅުމާލެ):

މި ފެސިލިޓީން އިސްރަށްވެހިންނަށް ބޭނުންވާ ހުރިހާ ޚިދުމަތެއް ލިބޭނެ އިންތިޒާމް ހަމަޖެހިގެންދާނެއެވެ.

9) ޕާކިން ބިލްޑިން- އިނޮވޭޓިވް ޕާކިން ސޮލިއުޝަން (ހުޅުމާލެ):

މިއީ ހުޅުމާލޭގައި 15 ޕާކިން ބިލްޑިންގ ތަރައްގީކުރުމަށް ހަމަޖެހިފައިވާ މަޝްރޫއެކެވެ.

10) އައިލް އެޑްވެންޗާ ޕާކު (ހުޅުމާލެ):

މިއީ ރާއްޖޭގައި ފުރަތަމަ ފަހަރަށް ރޭސިން ޓްރެކް، ޑްރިފްޓް ޓްރެކް، ގޯ-ކާޓް ޓްރެކް، ޕެއިންޓްބޯލް، ރޯލާ ސްކޭޓިން އަދި ވޯޓާ ތީމް ޕާކެއް ހިމެނޭ ގޮތަށް، ހުޅުމާލޭގައި ތަރައްގީކުރާ މަޝްރޫއެކެވެ.

11) ހިސްޓްރީ ސެންޓަރު (ހުޅުމާލެ):

މިއީ ރާއްޖޭގެ ތާރީޚު ކިޔައިދިނުމަށްޓަކައި ބިނާކުރާ  ތާރީޚީ މަރުކަޒެކެވެ.

12) ނޮލެޖް ޕާކް- އެޑިއުކޭޝަނަލް އިނޮވޭޝަން ސެންޓަރު (ހުޅުމާލެ):

މިއީ މާލެ ސަރަހައްދުގެ ވަކިވަކި ކޮލެޖް ޔުނިވާސިޓީތައް ހިންގުމަށް ޖާގަ ދޫކުރާނެ ސެންޓަރެކެވެ.

13) ނޫވެލި- އައިލެންޑް ރިޓްރީޓް (ގަލުފަޅު):

ލެގޫން ވިއު ފެންނަ 31 ޔުނިޓާއި، ހޮރައިޒަން ވިއު ފެންނަ 31 ޔުނިޓު އަދި 39 ގެސްޓް ވިލާ ތަރައްގީކުރާގޮތަށް، ގަލުފަޅުގެ ފަޅުތެރޭގައި "ނޫވެލި" ގެ ނަމުގައި ލަގްޒަރީ ގެތަކެއް ތަރައްގީކުރުމުގެ ބިޔަ މަޝްރޫއެކެވެ.

14) ކިނާރިއާ- ޑެސްޓިނޭޝަން އައިލެންޑް (ކުޑަގިރި ފަޅު):

މިއީ  ޓޫރިޒަމާއި، މުނިފޫހި ފިލުވުމާއި، ކޭމްޕިން އަދި ހިތްހަމަޖައްސާލުމަށް ދިއުމަށް އެންމެ އެކަށީގެންވާ ގޮތަށް ތަރައްގީކުރުމަށް ހަމަޖެހިފައިވާ އައިލެންޑެކެވެ.

15) ސްމާޓް ވެއާ ހައުސް ކޮމްޕްލެކްސް (ހުޅުމާލެ):

 މިއީ ކޯލްޑް ސްޓޯރޭޖާއި، ވެއާހައުސިންގް އަދި ލޯކަލް ވިޔަފާރިތަކަށް ހާއްސަ ވެއާ ހައުސް ކޮމްޕްލެކްސް އެއް ހިމެނޭ ތަނެކެވެ.

16) ސީނިކް ސިޓީ- ގަސް އިންދުމުގެ މަޝްރޫއު (ހުޅުމާލެ):

މި މަޝްރޫއުގެ މަގްސަދަކީ މި ދައުރުގެ ތެރޭގައި ފަސް މިލިއަން ގަސް އިންދުމެވެ.

މީގެ އިތުރުންވެސް މި ރަސްމިއްޔާތުގައި  އައިލް އެޑްވެންޗާ ޕާކުގެ ޑިޒައިން ކޮންސަލްޓަންސީ އަދި ތަނުގެ އޮޕަރޭޝަންއަށް މުހިންމު ތަމްރީނުތައް ދިނުމާ ގުޅޭ ފަހުމުނާމާއެއްގައި އެޗްޑީސީގެ މެނޭޖިން ޑިރެކްޓަރ، ފަޒުލް ރަޝީދު އަދި ސިޓީ ޑިވޮލަޕްމަންޓްސް ޕްރައިވެޓް ލިމިޓެޑްގެ ޑިރެކްޓަރު ޑޭވިޑް ޕިއެރިސް ސޮއިކުރައްވާފައިވާކަން ފާހަގަކޮށްލަން ޖެހެއެވެ.