މީޑިއާ ކައުންސިލާއި، ބްރޯޑްކާސްޓިން ކޮމިޝަން އުވާލައި،  ސަރުކާރުން ވުޖޫދަށް ގެންނަން އުޅޭ މީޑިއާ އެންޑް ބްރޯޑްކާސްޓިން ކޮމިޝަން އުފައްދައި ކޮމިޝަނަށް ގިނަ ބާރުތަކެއް ދިނުމަށް މަޖިލީހަށް ހުށަހަޅާފައިވާ ބިލުގައި ހިމަނާފައިވާތީވެ، އިދިކޮޅު އެމްޑީޕީން ކަންބޮޑުވުން ފާޅުކޮށްފިއެވެ.

ސަރުކާރުން ނިންމާފައިވަނީ، މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލުމަށްފަހު، މިހާތަނަށް ދެ ކޮމިޝަނުން ކުރަމުން އައި މަސައްކަތްތައް އެ ކޮމިޝަނަކުން ކުރިއަށްގެންދާށެވެ.

މިކަމާ ގުޅޭގޮތުން އިދިކޮޅު އެމްޑީޕީން ނެރެފައިވާ ބަޔާނެއްގައި ބުނެފައިވަނީ ރައީސުލްޖުމްހޫރިއްޔާގެ ފުރިހަމަ ކޮންޓްރޯލް އޮންނަގޮތަށް ވުޖޫދަށް ގެނައުމަށް ތައްޔާރުވަމުންދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެއްދުމަށް އަމިއްލަ މެމްބަރެއް ލައްވައި ރައްޔިތުންގެ މަޖިލީހަށް ހުށަހަޅާފައިވަނީ ސަރުކާރުގެ މަކަރުވެރި ރޭވުމެއްގެ ތެރެއިންކަމަށެވެ. މިއީ މީޑިއާގެ މިނިވަންކަން ކަފުންކުރުމަށް ސދަރުކާރު އަޑީގައި އޮވެގެން މަޖިލީހަށް ވައްދާފައިވާ ބިލެއްކަމަށް އެމްޑީޕީން ވަނީ ތުހުމަތުކޮށްފައެވެ.

Advertisement

މީޑިއާ ކޮމިޝަން އެކުލެވިގެންވަނީ ރައީސުލްޖުމްހޫރިއްޔާ އައްޔަނުކުރާ 4 މެމްބަރުންނާއި މީޑިއާތަކުން އައްޔަނުކުރާ 3 މެމްބަރެއްގެ މައްޗަށެވެ. އެމްޑީީޕީން ބުނީ ކޮމިޝަނުގެ ރައީސާ ނައިބުރައީސް އައްޔަނުކުރުމުގެ ބާރު އޮންނަނީ ރައީސުލްޖުމްހޫރިއްޔާއަށް ލިބިދީފައި ކަމަށެވެ. 

މިކަން މިހެން އޮތުމުން އެމްޑީޕީން ގަބޫލުކުރަނީ މިއީ މީޑިއާތައް އަމިއްލައަށް ރެގިއުލޭޓްކުރުމަށް އޮތް މަގު ބަންދުވެ، ސަރުކާރުގެ ނުފޫޒު މީޑިއާތަކުގެ މައްޗަށް ހައްދެއްނެތި ހިންގުމަށް ފަހިކުރާ ފުރުސަތެއްގެ ގޮތުގައި ކަމަށް އެޕާޓީން ބުންޏެވެ.

އެމްޑީޕީން ބުނީ މި ބިލް މިހާރު އޮތްގޮތުން މީޑިއާއަށް ކަށަވަރުކޮށްދީފައިވާ ދުލާއި ގަަލަމުގެ މިނިވަންކަމަށް ހުރަސް އަޅައި، ޑިމޮކުރަސީގެ 4 ވަނަ ބާރުގެ ގޮތުގައި ނޫސްވެރިންނާ މީޑިއާތަކުން ކުރަމުންދާ މަސައްކަތްތަކަށް ހުއްޓުމަކަށް އަންނާނެ ކަމަށެވެ. ސަރުކާރު ޒިންމާދާރު ކުރުމަށް މީޑިއާގެ މުހިއްމު ދައުރެއް އަދާކުރާއިރު، މީޑިއާގެ މިނިވަންކަން ގެއްލޭ މި ބިލަށް އެމްޑީޕީން ތާއީދު ނުކުރާނޭކަމަށާއި، މީޑިއާތަކަށް ހުރަސްއެޅުމަށް ސަރުކާރުން ކުރަމުންދާ މަސައްކަތް ހުއްޓާލުމަށް އެމްޑީޕީގެ މި ބަޔާނުގައި ވަނީ ގޮވާލާފައެވެ.