އެއްހާސް ކިލޯ މީޓަރަށް ދަތުރުކުރުމުގެ ގާބިލްކަން ލިބިގެންވާ ދުރު ރާސްތާ މިސައިލެއް ޓެސްޓްކުރުމަށް އިންޑިއާއިން ތައްޔާރުވެއްޖެއެވެ.

މަނަވަރު ފަހަރަށް ހަމަލާ ދިނުމުގެ ގާބިލްކަން ލިބިގެންވާ މި އެންޓި-ޝިޕް މިސައިލަކީ އެއްގަމުންވެސް އަދި މަނަވަރަކުންވެސް އުދުއްސާލެވޭނެ މިސައިލެއްކަމަށް އިންޑިއާގެ ޑިފެންސް ރިސަރޗް އެންޑް ޑިވެލޮޕްމަންޓް އޯގަނައިޒޭޝަނުން ބުނެއެވެ.

މި މިސައިލްތައް ބޭނުންކުރާނީ އިންޑިއާގެ ނޭވީ އިންނެވެ. އިންޑިއާ ކަނޑުގެ ސިފައިންގެ އިތުރުން އިންޑިއާގެ އެއްގަމު ސިފައިންނާއި ވައިގެ ސިފައިންގެ ލަޝްކަރުތަކުންވެސް އާ ބެލެސްޓިކް މިސައިލްތަކަށް މިހާރު ވަނީ އޯޑަރު ދީފައެވެ.

Advertisement

މީގެ ތެރޭގައި މެދު ރާސްތާ އަދި ކުރު ރާސްތާ މިސައިލްވެސް ހިމެނެއެވެ. މިއީ ޒަމާނީ ބަދަލުތަކާއެކު އަސްކަރިއްޔާތަކަށް އަންނަމުންދާ ކުރިއެރުންތަކާ އެއް ހަމައެއްގައި ފައި ހަމަކުރުމަށް އިންޑިއާއިން ކުރަމުންދާ މަސައްކަތުގެ ބައެކެވެ.

އިންޑިއާގެ އިރުމަތީގައި ޗައިނާއާއެކު ހިއްސާ ބޯޑަރު ސަރަހައްދު ބެލެހެއްޓުމަށް ގިނަ އަދަދެއްގެ މިސައިލާއި ރޮކެޓް ބަހައްޓާފައިވެއެވެ. ޗައިނާއަކީވެސް އެންމެ ގިނަ އަދަދަކަށް މިސައިލާއި ރޮކެޓް ހުރި އެއް ގައުމެވެ.