ބަންކަރިން ވިޔަފާރިން މިހާރުވެސް މިލިއަނަކަށްވުރެ ގިނަ ޑޮލަރު ލިބިއްޖެކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ދައުލަތުގެ މީޑިއާއިން ގެނެސްދިން "ހަފްތާ 52" ޕްރޮގްރާމްގައި  ވާހަކަދައްކަވަމުން މިނިސްޓަރު ސައީދު ވިދާޅުވީ، މިހާތަނަށް މިޑްޓާމް ބަޖެޓް ރިޕޯޓެއްގައި ޓޫރިޒަމް ސިނާއަތުން ނޫން ގޮތަކަށް އާމްދަނީ ލިބޭނޭކަމަށް ހިމަނާފައި ނުވާނޭކަމަށެވެ. ނަމަވެސް މިހާ ދަތީގައި އިގްތިސާދު ހިނގަމުންދަނިކޮށްވެސް އޯފްޝޯ ބަންކަރިން ހިދުމަތުން އެސްޓީއޯއަށް 1.5 މިލިއަން ޑޮލަރުގެ އާމްދަނީއެއް ލިބިފައިވާކަމަށެވެ.

 ބަންކަރިން ހިދުމަތް ފެށިފަހުން މިވީ ދުވަސްތަކުގައި އާމްދަނީގެ ގޮތުގައި މިލިއަނަކަށްވުރެ ގިނަ ޑޮލަރު ލިބިފައިވާކަމަށް އިގްތިސާދީ ވަޒީރު ވިދާޅުވެފައިވާއިރު، ބަންކަރިން ހިދުމަތް ހުއްޓިފައިވާކަމަށް ބުނެ އިދިކޮޅު ބައެއް ފަރާތްތަކުން ދަނީ ސަރުކާރަށް ފާޑުކިޔަމުންނެވެ.

Advertisement

އެމްޕީއެލްއާއެކު އެސްޓިއޯއިން އިހަވަންދިއްޕޮޅުގައި ބަންކަރިން ހިދުމަތް ފަށާފައިވަނީ މިއަހަރުގެ ސެޕްޓެމްބަރުމަހުގެ 19 ވަނަ ދުވަހުއެވެ.

ބަންކަރިން ހިދުމަތަށް އެސްޓިއޯއިން 15 އާއި 20 މިލިއަނާ ދެމެދުގެ އަދަދެއްގެ އެމެރިކާ ޑޮލަރު އިންވެސްޓްކުރުމަށް ވަނީ ހަމަޖެހިފައެވެ.

އެސްޓީއޯއިން ބަންކަރިންގެ ހިދުމަތް ކުރިއަށްގެންދަނީ ބަންކަރިން ހިދުމަތުގައި ފާހަގަކޮށްލެވޭ ވިޓޯލް އާ ގުޅިގެންނެވެ. ބަންކަރިން ހިދުމަތާ ގުޅޭގޮތުން އެސްޓީއޯގެ އެމްޑީ ޝިމާދު ވިދާޅުވެފައިވަނީ، މި ހިދުމަތް ފުރަތަމަ ފަށައިގަންނާނީ ދެ ބާވަތެއްގެ ކާގޯއިން ކަމަށާއި އެއީ ޑީސަލް އަދި ލޯ ސަލްފާ ފިޔުލް އިން ކަމަށެވެ. އަދި ފުރަތަމަ މި ހިދުމަތް ދޭނީ ރާއްޖެ ސަރަހައްދުން ދަތުރުކުރާ ލަގްޒަރީ ޔޮޓްތަކަށާއި، ބޮޑެތި ބޯޓްފަހަރުތަކަށް ކަމަށް އޭނާ ވަނީ ވިދާޅުވެފައެވެ.

ބަންކަރިން ހިދުމަތަކީ މި ސަރުކާރުން ހިންގުމަށް ރާވާފައިވާ އިޤްތިސާދީ މަޝްރޫޢުތަކުގެ ތެރެއިން އެންމެ ފާހަގަކޮށްލެވޭ އެއް މަޝްރޫޢުއެވެ