އެކި މައްސަލަތަކުގައި މިހާތަނަށް ގަވާއިދާއި ޚިލާފަށް އުޅެމުންދިޔަ 5،000 އަށް ވުރެ ގިނަ ބިދޭސީން ޑީޕޯޓު ކޮށްފައިވާ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ވިދާޅުވެއްޖެއެވެ.
ވަޒީރު އިހުސާން މިފަދައިން ވިދާޅުވީ، "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުންނެވެ.
މިގޮތުން، ބިދޭސީންގެ މައްސަލަ ހައްލު ކުރުމަށް މިދިޔަ އަހަރުގެ ނޮވެމްބަރު 17 އިން ފެށިގެން ކުރި މަސައްކަތަށް އަލިއަޅުއްވާލައްވަމުން ވަޒީރު އިހުސާން ވިދާޅުވީ، ކުށްތަކަށް އަރައިގަންނަމުން އައި ބިދޭސީން ހައްޔަރުކޮށް، 48 ގަޑިއިރު ތެރޭ ރާއްޖެއިން ފޮނުވާލެވޭނެ ނިޒާމެއް ގާއިމުކޮށްފައިވާކަމަށެވެ.
"އަޅުގަނޑުމެންވާނީ ރާއްޖޭގައި ކުދި ވިޔަފާރިތަކަށް ހުރަސްތަކެއް އަޅަމުންދިޔަ ބިދޭސީންގެ ވިޔަފާރިތައް ހުއްޓުވާ އެފަދަ ވިޔަފާރިތަކުގައި ގަވާއިދާ ޚިލާފަށް އުޅެމުންދިޔަ ބިދޭސީން 48 ގަޑިއިރުގެ ތެރޭގައި ފުރުވާލުމުގެ އިންތިޒާމުވާނީ ހަމަޖައްސާފައި،"
ވަޒީރު އިހުސާން ވިދާޅުވިއެވެ.
މި މަސައްކަތުގެ ތެރެއިން، މިހާތަނަށް ގަވާއިދާއި ޚިލާފަށް ރާއްޖޭގައި އުޅެމުންދިޔަ 5000 އެއްހާ ބިދޭސީން މިހާރު ރައްޖެއިން ފުރުވާލާފައިވާކަމަށެވެ.
މީގެ އިތުރުންވެސް ވަޒީރު އިހުސާން ވިދާޅުވީ، ގަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ "އޮޕަރޭޝަން ކުރަނގި" ރާއްޖޭގެ 138 ރަށެއްގައި މިވަގުތު ކުރިއަށްދާކަމަށާއި، މި މަސައްކަތުގެ ތެރެއިން 10،000 އަށްވުރެ ގިނަ ބިދޭސީންގެ ބަޔޯމެޓްރިކްސް ނެގިފައިވާކަމަށެވެ.
Advertisement
This content is created and paid for by advertisers and does not involve Voice Journalists
