ބައިނަލް އަގުވާމީ ހަކުރު ބަލީގެ ދުވަސް ފާހަގަ ކުރުމުގެ ގޮތުން އެސްޓީއޯ މެޑިކަލް ސާވިސަސް އާއި ހުޅުމާލެ ހޮސްޕިޓަލް ގުޅިގެން ހޭލުންތެރިކަން އިތުރު ކުރުމުގެ ޕްރޮގްރާމެއް ފަށައިފިއެވެ.

މި ޕްރޮގްރާމުގެ ތެރެއިން މިއަދު ވަނީ "އަކުއާ ފިޓްނެސް ފެސްޓް" ނަމުގައި އެކްޓިވް ބީޗް ހަރަކާތްތަކެކެއް ހުޅުމާލޭގައި ބީޗްގައި ކުރިއަށް ގެންގޮސްފައެވެ. މި އިވެންޓުގައި ހުޅުމާލޭގައި މަސައްކަތް ކުރާ ކޯޕަރޭޓް އޮފިސްތަކުގެ މުވައްޒަފުންގެ ތެރެއިން 100 އަށްވުރެ ގިނަ މުވައްޒަފުންވަނީ ބައިވެރިވެފައެވެ.

މި ފެސްޓްގެ މައިގަނޑު މަގްސަދަކީ އެކްޓިވް ލައިފްސްޓައިލް ޕްރޮމޯޓްކޮށް މުއައްސަސާތަކުގެ މެދުގައި އެކުވެރިކަން ބަދަހި ކުރުންކަމަށް އެސްޓިއޯއިން ބުނެއެވެ. މިގޮތުން އެކި ޓީމްތަކަކަށް ބަހާލައިގެން މި ފެސްޓްގައި ބޭއްވުނު އެކްޓިވް ހަރަކާތްތައް ރާވާ ހިންގާފައިވަނީ ދިވެހިރާއްޖޭގެ ޤައުމީ ދިފާއީބާރުގެ ބެލުމުގެ ދަށުންނެވެ.

Advertisement

އަކުއާ ފިޓްނެސް ފެސްޓް ހަރަކާތުގެ ތެރެއިން..

މި ފެސްޓްގައި އެސްޓީއޯއިން ވަނީ ބޭނުންކުރަން ފަސޭހަ އަދި ކޮލިޓީ ރަނގަޅު ހަކުރު މޮނިޓަރ ކުރާ ޑިވައިސްއެއް ތައާރަފްކޮށްފައެވެ. މި ޑިވައިސް އަކީ ގޭގައި ވެސް ބޭނުންކުރަން ފަސޭހަ، ސްމާޓް ޑިވައިސް އެކެވެ. މިގޮތުން މި ޑިވައިސް ސްމާޓް ފޯނާއި ކަނެކްޓް ކޮއްލުމަށްފަހު ހަކުރު މޮނިޓަރ ކުރުމުން އޮޓޯ އިން ހަކުރު ހުރިވަރު ފޯނުގައި ރައްކާކުރެވޭނެއެވެ. މި ގޮތަށް ސްޓޯ ކުރެވޭ މައުލޫމަތުތަކަކީ އަމިއްލަ އަށް އަދި ޑަކްޓަރީ ފަރުވާ ހޯއްދަވާއިރު ހަކުރު މެނޭޖްކޮށް މޮނިޓަރ ކުރުމަށް ވަރަށް މުހިއްމު މައުލޫމާތުތަކެކެވެ. އެސްޓީއޯ އިން އަލަށް ތައާރަފް ކުރި މި ބްލަޑް ގްލޫކޯޒް މޮނިޓަރިން ޑިވައިސް އަކީ ކޮރެޔާގެ ބްރޭންޑެއް ކަމުގައިވާ އެސްޑީ ބަޔޯސެންސަރ ބްރޭންޑްގެ ޑިވައިސްއެކެވެ.

އެސްޓިއޯއިން ތައާރަފްކުރި ޑިވައިސް

އެސްޓީއޯ އާއި ހުޅުމާލެ ހޮސްޕިޓަލް ގުޅިގެން ބައިނަލް އަގުވާމީ ހަކުރު ބަލީގެ ދުވަސް ފާހަގަ ކުރުމުގެ ޕްރޮގްރާމްގެ ދަށުން 14 ނޮވެމްބަރ 2024 ގައި ހުޅުމާލެ ޕޮލިސް ސްޓޭޝަން ގެ މުވައްޒަފުނަށްވެސް ހެލްތް ސްކްރީނިންގ ސެޝަންއެއް ވަނީ ކުރިޔައްގެންގޮސްފައެވެ. މި ސެޝަަންގައި ހުޅުމާލެ ޕޮލިސް ސްޓޭޝަން ގައި މަސައްކަތް ކުރައްވާ ބޭފުޅުންނަށް ދެވިފައިވާ ހިދުމަތްތަކުގެ ތެރޭގައި ލޭގެ ޕްރެޝަރ، ބީއެމްއައި، އަދި ހަކުރު ޗެކްކުރުމަށް ފަހު ހެލްތް ގައިޑެންސް ދިނުން ހިމެނެއެވެ.

އަކުއާ ފިޓްނެސް ފެސްޓް ހަރަކާތުގެ ތެރެއިން..

މީގެ ތެރޭގައި ހަކުރު މެނޭޖް ކުރުމަށް ގެނެވިދާނެ ލައިފްސްޓައިލް ޗޭންޖެސް، ޑައިޓް ޕެލޭންސް، އެކްސަސައިޒް އަދި އިތުރު ބޭނުންތެރި މައުލޫމާތު ވަނީ ހިއްސާ ކުރެވިފައެވެ.

އެސްޓީއޯއިން ބުނީ މި ހެލްތް ސްކްރީނިން ސެޝަން އާންމުނަށް ހުޅުވާލުމަށްވެސް ވަނީ ހަމަޖެހިފައެވެ. އާއްމުނަށް މި ސެޝަން ކުރިޔައް ގެންދިއުމަށް ހަމަޖެހިފައިވަނީ 16 ނޮވެމްބަރ 2024 ވާ ހޮނިހިރު ދުވަހު މެންދުރު 13:30 އިން 15:30 އަށް ހުޅުމާލެ ހޮސްޕިޓަލުގައި ހުންނަ އެސްޓީއޯ ފާމަސީ ކުރިމަތީގައެވެ.

 ހަކުރު ބަލީގެ ދުވަސް ފާހަގަ ކުރުމުގެ ގޮތުން ދެން ރާވައިފައިވާނީ ޑައިބެޓިކް ޕޭޝެންޓުންނަށް ހާއްސަ ސެޝަންއެއް ބޭއްވުމަށެވެ. މި ސެޝަންގައި ޑައިބެޓިކް ޕޭޝަންޓުންނަށް ބޭނުންވާ މުހިއްމު ސިއްހީ މައުލޫމާތު ދިނުމަށް ވަނީ ހަމަޖެހިފައިވާކަމަށް އެސްޓިއޯއިން ބުނެއެވެ.