ޕާސްޕޯޓާއި ދިވެހި ރައްޔިތެއްކަން އަންގައިދޭ އައިޑީކާޑު ހެއްދުމުގެ ހިދުމަތް މުޅި ރާއްޖެއަށް ފުޅާކުރުމުގެ މަސައްކަތް އިފްތިތާހްކޮށްފިއެވެ.

ރައީސް އޮފީހުގައި ބޭއްވި ރަސްމިއްޔާތެއްގައި، ޕާސްޕޯޓާއި ދިވެހި ރައްޔިތެއްކަން އަންގައިދޭ އައިޑީކާޑު ހެއްދުމުގެ ހިދުމަތް މުޅި ރާއްޖެއަށް ފުޅާކުރުމުގެ މި މަސައްކަތް ފައްޓަވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. މި ރަސްމިއްޔާތުގައި ސަރުކާރުގެ ކަމާބެހޭ އިދާރާތަކުގެ ވެރިން ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ވާހަކަދައްކަވަމުން ދާހިލީ ވަޒީރު އަލީ އިހްސާން ވިދާޅުވީ، މިއަދު ފެށިގެން މިދިޔައީ ރައީސް ޑރ.މުއިއްޒުގެ ސިޔާސަތުގެ ތެރޭގައި ހިމެނޭ ވަރަށް މުހިއްމު މަސައްކަތެއް ކަމަށެވެ. އައިޑީކާޑު ހިދުމަތާއި ޕާސްޕޯޓް ހިދުމަތް ލާމަރުކަޒީ ނިޒާމުގެ ތެރެއިން ރައްޔިތުންނަށް ދިނުމަކީ ރައީސް މުއިއްޒުގެ ވައުދުފުޅެކެވެ.

Advertisement

އައިޑީކާޑާއި، ޕާސްޕޯޓްގެ ހިދުމަތް މުޅި ރާއްޖެއަށް ފުޅާކުރުމުގައި މިދިޔަ ސަރުކާރުތަކަށް އޮތް އެންމެބޮޑު ގޮންޖެހުމަކީ މައުލޫމާތުގެ ރައްކާތެރިކަން ކަށަވަރުކުރުން ކަމަށާއި، މި ސަރުކާރުން މިކަން ކުރަނީ މިކަން ވަރަށް ރަނގަޅަށް ބެލިގެންދާ އުސޫލަކުން މައުލޫމާތު ރައްކާތެރިކަން ކަށަވަރުކުރުމަށްފަހުގައި ކަމަށް މިނިސްޓަރު ވިދާޅުވިއެވެ.

ޕާސްޕޯޓާއި އައިޑީކާޑު ހެއްދުމުގެ ހިދުމަތް މުޅި ރާއްޖެއަށް ފުޅާކުރުމުގެ މަސައްކަތް ރަސްމީކޮށް އިފްތިތާހުކުރުމުގެ ތެރެއިން.. ފޮޓޯ/ރައީސް އޮފީސް

މިއ3ަދު އިފްތިތާހުކުރި މި މަޝްރޫޢުގެ ދަށުން 6 ސަރައްދެއްގައި އައިޑީކާޑާއި ޕާސްޕޯޓް ހައްދައިދޭން ފަށާނެއެވެ. މިގޮތުން މިއަހަރު ޕާސްޕޯޓް ހައްދައިދިނުމުގެ ހިދުމަތް ހުޅޫމާލެ ފޭސް އެކެއް އަދި ދޭއްގެ އިތުރުން ކުޑަހުވަދުއާ ހައްދުންމަތީ ފުނަދޫގައި ފަށާނެއެވެ. އަދި އައިޑީކާޑު ހައްދައިދިނުމުގެ ހިދުމަތް ހުޅުމާލޭގެ އިތުރުން ވިލިމާލެ އަދި ކުޅުދުއްފުށީގައި ފަށާނެއެވެ.

ސަރުކާރުން އަމާޒު ހިފާފައިވަނީ އަންނަ އަހަރު ނިމުމުގެ ކުރިން، ޕާސްޕޯޓާއި ދިވެހި ރައްޔިތެއްކަން އަންގައިދޭ އައިޑީކާޑު ހެއްދުމުގެ މަޝްރޫޢުގެ މަސައްކަތް ނިންމުމަށެވެ.