"ގެދޮރުވެރިޔާ" ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓް އާއްމުކުރުމަށްޓަކައި، އެ ލިސްޓްގެ ސައްހަކަން ކަށަވަރުކުރަން އަދިވެސް ވަގުތު ބޭނުންވާކަމަށް ހައުސިން މިނިސްޓްރީން ބުނެފިއެވެ.
ގެދޮރުވެރިކަމާ ބިމާއި އުމްރާނީ ތަރައްޤީއާ ބެހޭ ވުޒާރާއިން މިއަދު ނެރުނު ބަޔާނެއްގައި ބުނީ، ގެދޮރުވެރިޔާ ސްކީމްގެ 4،000 ފްލެޓް ދާއިމީ ލިސްޓް އެކުލަވާލުމުގައި ކޮރަޕްޝަނަށް މަގުފަހިކާ ކަންކަން ހުރިކަމަށް އާއްމު ފަރާތްތަކަކުން ތުހުމަތުކޮށްފައިވާތީވެ، އެ ލިސްޓް މުރާޖައާކުރުމަށް އަދިވެސް ވަގުތު ބޭނުންވާކަމަށެވެ.
ކުރިން އޮތްގޮތުން ގެދޮރުވެރިޔާ ފްލެޓްގެ ދާއިމީލިސްޓް ހާމަކުރުމަށް ތާވަލްކޮށްފައި އޮތީ މިއަދުގެ ވަގުތެއްގައެވެ.
މިކަމާ ގުޅޭގޮތުން ހައުސިން މިނިސްޓްރީން ބުނީ ގެދޮރުވެރިޔާ ސްކީމުގެ އުސޫލުގެ ދަށުން ހުށަހަޅާފައިވާ 20،697 އެޕްލިކޭޝަން ފޯމް ބެލުމުގައި ކަށަވަރުކުރަންޖެހޭ ގިނަ ކަންކަން ހުރުމާ ގުޅިގެން މަސައްކަތްތައް ނިންމުމަށް އިތުރު މުއްދަތު ބޭނުންވާކަމަށެވެ. މި ސްކީމްގެ ވަގުތީ ލިސްޓާއި ރީ-އިވެލުއޭޝަން އާ ގުޅިގެން ކުރިއަށްގެންދެވުނު މަސައްކަތްތަކުގެ ތަފްސީލުތައް މި މަސައްކަތް ނިމުނުހާ އަވަހަކަށް އާއްމުކުރާނޭކަމަށް ހައުސިން މިނިސްޓްރީން ބުނެއެވެ.
މި މަސައްކަތަށް އިތުރު ވަގުތު ނެގިނަމަވެސް ސަރުކާރުގެ މަގްސަދަކީ މި ސްކީމުން ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރުކުރުމާއެކު، މި ސްކީމުގެ ދަށުން ތަރައްޤީކުރާ ފްލެޓްތައް ދޫކުރެވެނީ ހައްގުވެރިންނައްކަން ކަށަވަރުކުރުންކަމަށްވެސް މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
