އިތުރު ހިދުމަތްތަކާއެކު، ހުޅުމާލެ ހޮސްޕިޓަލް ޓާޝިއަރީ ހޮސްޕިޓަލަކަށް ސަރުކާރުން ބަދަލުކޮށްފިއެވެ.

މިކަމާ ގުޅޭގޮތުން މިއަދު ބޭއްވި ރަސްމިއްޔާތެއްގައި ހުޅުމާލެ ހޮސްޕިޓަލް ޓާޝިއަރީ ފެންވަރުގެ ހޮސްޕިޓަލަށް ބަދަލުކޮށް ޒަމާނީ ވަސީލަތްތަކާއެކު ގާއިމްކުރި އައިސީޔޫ އާއި އޮޕަރޭޝަން ތިއޭޓަރުތަކާ އެންއައިސީޔޫގެ ހިދުމަތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. މި ރަސްމިއްޔާތުގައި ވަނީ އެކަމުގެ ރަސްމީ ލިޔުން ހުޅުމާލެ ހޮސްޕިޓަލާ ހަވާލުކޮށްފައެވެ.

ހުޅުމާލެ ހޮސްޕިޓަލުން ބުނީ މިއަދު އެ ހޮސްޕިޓަލުގައި އަލަށް ގާއިމްކުރި ހިދުމަތްތަކާއެކު ސިއްހީ ދާއިރާއަށް އިންގިލާބީ ބަދަލެއް އަންނާނެ ކަމަށެވެ. ހުޅުމާލޭ ހޮސްޕިޓަލުގައި އޮޕަރޭޝަން ކޮމްޕްލެކްސް ސެންޓަރުގެ އިތުރުން އައިސީޔޫ އަދި އެންއައިސީޔޫ ތަރައްޤީކޮށްފައިވަނީ، ޒަމާނީ މެޑިކަލް ވަސީލަތްތަކާއެކުގައެވެ.

ހުޅުމާލެ ހޮސްޕިޓަލް ޓާޝިއަރީ ހޮސްޕިޓަލަކަށް ބަދަލުވިކަމުގެ ރަސްމީ ލިޔެކިޔުން ހަވާލުކޮށްދެއްވުމުގެ ތެރެއިން... ފޮޓޯ/ ރައީސް އޮފީސް

މީގެ ތެރެއިން  އަލަށް ގާއިމްކުރި އޮޕަރޭޝަން ކޮމްޕްލެކްސްގައި އޮޕަރޭޝަންތައް ކުރުމަށް 4 ތިއޭޓަރު ވަނީ ގާއިމްކޮށްފައެވެ.  އައިސީޔޫގައި 10 އެނދު ހިމެނޭއިރު، އެންއައިސީޔޫ ޔުނިޓް ތަރައްޤީކޮށްފައިވަނީ 14 އެނދު ހިމަނައިގެންނެވެ.

ހުޅުމާލެ ހޮސްޕިޓަލުން ބުނީ އަލަށް އިތުރުކުރެވުނު ހިދުމަތްތަކާއެކު މިހާރު އެހެން ހޮސްޕިޓަލްތަކަށް ބަލިމީހުން ފޮނުވަމުންދާ އަދަދު ވަރަބޮޑުތަނުން މަދުވެގެން ދާނޭކަމަށެވެ.

މި ރަސްމިއްޔާތުގައި ވާހަކަދައްކަވަމުން ހެލެތް މިނިސްޓަރު ޢަބްދުﷲ ނާޒިމް ވިދާޅުވީ، ހުޅުމާލެ ހޮސްޕިޓަލާއި ވިލިމާލެ ހޮސްޕިޓަލް ތަރައްޤީކޮށްގެން މެނުވީ މާލޭގެ ސިއްހީ ނިޒާމަށް މިއަދު އޮތް ބުރަ ރަނގަޅު ނުކުރެވޭނެ ކަމަށެވެ. އަދި އަތޮޅުތެރޭގެ ސިއްހީ ނިޒާމު ރަނގަޅުކޮށްގެން މެނުވީ ދިވެހިރާއްޖޭގެ ސިއްހީ ނިޒާމުގައި މިއަދު މިއޮތް ކަންބޮޑުވުމަށް ހައްލު ލިބިގެން ނުދާނޭކަމީ އަދުގެ ސަރުކާރުން ގަބޫލުކުރާ ސިޔާސަތު ކަމަށެވެ. މިކަންކަން ކުރުމަށް ސަރުކާރުން ރާއްޖޭގެ މުޅި ސިއްހީ ނިޒާމު ބަދަލުކުރުމުގެ މަސައްކަތް ފަށާފައިވާކަން މިނިސްޓަރު ފާހަގަކުރެއްވިއެވެ. 

ހެލްތު މިނިސްޓަރު ނާޒިމް ވާހަކަދައްކަވަނީ... ފޮޓޯ/ ރައީސް އޮފީސް

އާސަންދަ ނިޒާމާ ގުޅޭގޮތުން މިއަދުވެސް މިނިސްޓަރު ވިދާޅުވީ، އާސަންދަ ނިޒާމު މިހާރު އޮތީޫ އެންމެ ރަނގަޅަށް ނޫންކަމަށެވެ. މިގޮތުން މިހާތަނަށް އާސަންދައަށް ކަނޑައެޅިބަޖެޓުން އަހަރު ނިމިގެންދާއިރުވެސް ނުފުދޭކަމީ މި ނިޒާމު ރަނގަޅު ނޫންކަން ފެންނަން އޮތް ހަގީގަތެއްކަމަށާއި، މިއީ ރައްޔިތުންގެ ފައިދާއާ ލާބައަށް ކުރިއަށްދާ ނިޒާމެއް ނޫންކަން ވަރަށް ރަނގަޅަށް ދޭހަވެގެންދާކަމަށެވެ. 

މިނިސްޓަރު ވިދާޅުވީ ދިވެހިރައްޔިތުން އެދެނީ އާސަންދަ ނިޒާމް އެންމެ ބޭނުންވާ މީހާއަށް ދިނުންކަމަށާއި، އެކަން އެމަގުން ގެންދިއުމަށް ސަރުކާރުގެ ސިޔާސަތުތައް ތަންފީޒުކުރަމުންދާނޭކަމަށެވެ.

ހުޅުމާލެ ހޮސްޕިޓަލަކީ މީގެ 20 އަހަރުކުރިން ހުޅުވި ހޮސްޕިޓަލެކެވެ. ހުޅުމާލެ ހޮސްޕިޓަލަކީ މިހާރު އެންމެ ގިނަ މީހުން ފަރުވާ ހޯދަމުން އަންނަ އެއް ހޮސްޕިޓަލެވެ. ހުޅުމާލެ ހޮސްޕިޓަލުން ބުނީ އަވަސް ފަރުވާގެ ހާލަތުގައި މިހާރު އެންމެގިނަ މީހުން ދައްކަން އަންނަ ހޮސްޕިޓަލަކީ ހުޅުމާލެ ހޮސްޕިޓަލް ކަމަށެވެ.